Аввалроқ саҳифамиз орқали #Kunmobilmuxbiri’нинг Андижон тумани Бўтақара қишлоғида торнадога ўхшаш чангли шамол кузатилаётгани тўғрисидаги видеосини эълон қилган эдик.
Ўзгидромет хабарига кўра, 25 август куни соат 15:00 ва 16:30 орасида Фарғона водийси вилоятлари ва Тошкент вилояти айрим ҳудудларида кичик майдонда атмосфера босими фарқларида кескин ўзгаришлар юзага келган. Бу Тожикистон Республикаси баланд Помир тоғликларидаги юқори босимли ҳудуд ҳамда Фарғона водийси вилоятларида паст босимли ҳудудларнинг кескин ривожланиш фонида юз берган.
Натижада, айрим жойларда кичик шамол уйирмалари, бошқача айтганда, қуюн ҳодисалари кузатилган.
«Қуюн ҳодисалари, узоқ муддатли ёғингарчиликсиз ёз кунларида тез-тез кузатиладиган ҳодиса бўлиб, бу табиат ҳодисалари Ўзбекистон шароитида хавфли пўртаналарни келтириб чиқармайди», — дейилади Ўзгидромет хабарида.
