Германия Ўзбекистонга инсонпарварлик ёрдами тариқасида 10 минг доза Casirivimab/Imdevimab комбинацияланган препаратини юборди.
2 сентябр куни Тошкент халқаро аэропортида дори воситасини қабул қилиб олиш тадбири бўлиб ўтди, дея хабар берди Соғлиқни сақлаш вазирлиги матбуот хизмати.
Тадбирда ССВ масъуллари, Германиянинг Ўзбекистондаги элчихонаси ходимлари ва журналистлар қатнашди.
Қайд этилишича, Швейцариянинг "Roche" фармацевтика компанияси ишлаб чиқарган Casirivimab/Imdevimab COVID-19 га қарши сунъий “антитаначалар коктейл”и бўлиб, ҳозирда препарат вируснинг янги штаммларига чидамли ягона препарат ҳисобланади.
Тадқиқот натижаларига кўра, препарат касалхонага ётқизиш ва коронавирусдан ўлим даражасини 70 фоизга камайтиргани ва касаллик аломатларининг давомийлигини 14 кундан 10 кунгача қисқартиргани айтилмоқда.