Доннарумма ва Рамосдан тортиб Месси ва Роналдугача.
1 сентябрь куни Европада ёзги трансферлар ойнаси ёпилди. Бу футбол тарихидаги энг ақл бовар қилмас трансферлар ойнаси бўлгани шубҳасиз. Роналду, Месси, Рамос, Лукаку, Доннарумма – бир гуруҳ юлдузли футболчилар клубларини ўзгартиришди. Қуйида ёзнинг энг асосий трансферлари келтирилади.
Жанлуижи Доннарумма (эркин агент), «Милан»дан «ПСЖ»га
2020/2021 йилги мавсум статистикаси: 48 ўйин, 15 «қуруқ» ўйин, 54та ўтказилган гол.
22 ёшли дарвозабон Италияда «Милан» учун ўйнашни бас қилди. «Россонери» сафида ўтган олти мавсумда Доннарумма жами 251 ўйинда майдонга тушиб, шундан 88тасида «нол»га ўйнади. Бу трансферлар ойнасида дунёнинг энг кучли футболчиларини текинга ўз сафига қўшиб олган «ПСЖ» Европа чемпионини қўлга киритиш имкониятини ҳам йўққа чиқармади. Доннарумма «ПСЖ» билан беш йиллик шартномага имзо чекди, аммо ҳозирча Франция чемпионатида дебют қилмади – у ўтган уч ўйинда ҳам захирада қолдирилди.
«ПСЖ» вакиллари мен билан боғланишди ва мени ўз жамоаларида кўришни исташаётганини айтишди, мен ҳам «ПСЖ»да ўйнашни истадим. Рақобат мени чўчитмайди. Кейлор Навас — қойилмақом дарвозабон, аммо мен бу ерга ўйнаш учун келдим. Рақобат иккимиз учун ҳам яхши, бундан мен фақат ўсаман. Катта клубларда доим кучли рақобат мавжуд бўлади, бу муаммо эмас. У ажойиб йигит, биз дўстлармиз… Мен жаҳоннинг энг яхши дарвозабонларидан бири бўлишни истайман. Бунинг учун эса қурбонликлар бериш керак, ишлаш керак ва камтарликни йўқотмаслик керак. Бу асосийси», – деган Доннарумма.
Ашраф Ҳакими (60 млн евро), «Интер»дан «ПСЖ»га
2020/2021 йилги мавсум статистикаси: 45 ўйин, 7 гол, 11 голли узатма.
6 июль куни «ПСЖ» «Интер»дан Ҳакими сотиб олинганини эълон қилди. Марокашлик бу футболчи «ПСЖ» билан беш йиллик шартнома имзолади ва ўтган вақт ичида жамоа сафида беш ўйинда майдонга тушиб улгурди, у бу ўйинларда бир гол уриб, икки голга узатма берган. Ҳакими Париж клуби тарихидаги энг қимматбаҳо бешинчи трансфер бўлди.
«Мен бу ерда бўлишдан бахтиёрман ва майдонга тушишни, жамоадошларим билан учрашишни сабрсизлик билан кутмоқдаман. Мен бу ерда катта ишлар қилмоқчиман. «ПСЖ» — юқори даражадаги клуб, сўнгги йилларда доимий равишда ўсиб, буни исботлаб келмоқда. Мен қаттиқ меҳнат қилиб, юқори натижаларга эришишни истайман, бу ерда бунга имкон бор. Ўтишдан олдин мен кўп марта Почеттино билан ғоялар ҳақида, мени бу ерда нималар кутаётгани ва мендан нима кутишаётгани ҳақида гаплашдим. Жуда фойдали суҳбатлар бўлди. Мен умумий мақсадимиз учун бор имкониятимизни ишга соламан. Олға, Париж», – деди Ҳакими.
Серхио Рамос (эркин агент) «Реал»дан «ПСЖ»га
2020/2021 йилги мавсум статистикаси: 21 ўйин, 4 гол, 2 голли узатма, 4 сариқ карточка.
Эркин агентга айланган 35 ёшли ҳимоячи «ПСЖ» билан икки йиллик шартнома имзолади, у бу клубда 4-рақамли футболкада тўп суради. Париж клубига ўтиш учун Рамос «Манчестер Сити» ва «Арсенал» клублари таклифларини рад этди. Испаниялик ҳимоячи ҳамон янги клуби учун дебют қилмади, Cadena Ser маълумотига кўра, «ПСЖ»дагилар унинг ўзини тутишидан норози. Серхио жамоадошлари ва персонал билан муносабатларда такаббурлик қилаётгани айтилган. Жамоадошлари унинг бундай манманлигига тоқат қилмоқчи эмас, агар у муносабатини ўзгартирмаса, «ПСЖ» бош мураббийи Маурисио Почеттино унга бошланғич таркибдан жой кафолатлай олмайди.
Рафаэль Варан (40 млн евро), «Реал»дан «Манчестер Юнайтед»га
2020/2021 йилги мавсум статистикаси: 41 ўйин, 2 гол, 4 сариқ карточка.
«Манчестер Юнайтед» ўтган мавсумда мудофаа чизиғидаги муаммолардан қийналди, Варан эса клубга айнан марказий ҳимоядаги муаммолар ҳал этилиши учун олиб келинди. Рафаэль Линделёф билан рақобатлашади ва Магуайр билан жуфтлик қилган ҳолда ўйнайди. Ҳимоячи «қизил иблислар» билан тўрт йиллик шартномага имзо чекди, у энди «Реал»даги собиқ жамоадоши Криштиану Роналду билан яна биргаликда тўп суради.
Вараннинг дебюти муваффақиятли чиқди: у «Вулверҳэмптон»га қарши ғалабали ўйинда (1:0) ягона гол муаллифи бўлган Гринвудни тўп билан таъминлаганди. «Варан жанговар ҳолатдалигини намойиш этди ва юқори самарадорлик кўрсатди. У «иккинчи қават»да тўп учун курашда кучли, тўп билан ажойиб муомала қилади. Варан шунчалик тажрибалики, уни ҳеч нарса ташвишга сола олмайди. У ноқулайлик ҳис қилмайди, мен унинг ўйинидан ҳайратдаман. Ўйлайманки, у ўз даражасини кўрсатди», — дея янги футболчининг ўйинига баҳо берганди Сульшер.
Давид Алаба (эркин агент), «Бавария»дан «Реал»га
2020/2021 йилги мавсум статистикаси: 32 ўйин, 2 гол, 3 голли пас.
Испан грандлари бу ёзда ноодатий тактика қўллашди — эркин агент сифатида текинга келадиган футболчиларга кўпроқ эътибор қаратилди. Алаба шундай футболчилардан бири бўлди. Австриялик ҳимоячи бунгача фақат «Бавария»да ўйнаган, бу клуб билан ютиш мумкин бўлган барча совринларни ютиб бўлгач, сўнгги йилларда ўз кучини бошқа чемпионатда синаб кўриш истагида эканини яширмаётганди. «Реал» эса ушбу футболчининг шартномаси муддати тугашини кутиб, уни Мюнхендан олиб келди.
Алаба кўп йиллар олдин жаҳон миқёсидаги юлдуз бўлиб етишган, аммо унга «Реал»да осон бўлмайди. Ёзда жамоани икки асосий марказий ҳимоячилар — Серхио Рамос ва Варан тарк этди. Олдиндаги мавсумда Давид ёш футболчилар билан биргаликда ҳимоядаги муаммоларни ечишга ҳаракат қилиши керак бўлади. «Реал» чемпионатни яхши бошлади, биринчи турда сафарда «Алавес» йирик ҳисобда мағлуб этилди (4:1). Алаба учун ҳам дебют аъло даражада кечди — у 90 дақиқа давомида майдонда бўлди ва тўртинчи гол урилганда Винисиусга ассистентлик қилди. Аммо кейинги турда «Хетафе»га қарши ўйинда 3та гол ўтказиб юборилди (3:3), фақат учинчи турга келиб «Бетис»га қарши ўйинда дарвоза дахлсизлиги сақлаб қолинди (1:0).
Родриго Де Пауль (35 млн евро), «Удинезе»дан «Атлетико»га
2020/2021 йилги мавсум статистикаси: 36 ўйин, 9 гол ва 9 голли пас.
АПЛда иккита 100 млн евродан қиммат трансфер амалга оширилган бўлса, Испанияда баҳолар анча камтарроқ бўлди. Ҳайратланарли жиҳати, Ла Лигадаги энг қиммат трансфер «Реал» ёки «Барселона» томонидан эмас, «Атлетико» томонидан амалга оширилди. «Матрасчилар» итальян клубига Родриго Де Паул учун 35 млн евро тўлашди.
Аргентиналик футболчи аллақачон «Удинезе» даражасидан ўсиб кетган ва бир неча йилдан буён жамоани ёлғиз ўзи елкасида кўтариб келарди. 27 ёшли футболчи терма жамоада ҳам ўз даражасини намойиш этди ва шу ёзда Америка Кубогида ғолиб чиқиб, ниҳоят кучлироқ жамоага ўтадиган бўлди. Мутахассислар, Родриго Диего Симеоненинг тизимига идеал даражада мос келиши ҳақида айтишган. Шундай бўлса, «Атлетико» чемпионлик титулини ҳимоя қилиши янада осонлашади.
Де Паулнинг «Атлетико»да дебюти ёмон чиқмади. Биринчи турда «матрасчилар» сафарда «Сельта»дан устун келишди (2:1). Аргентиналик футболчи захирадан майдонга тушиб 25 дақиқа ўйнади. Иккинчи турда эса «Эльче»га қарши ўйинда (1:0) ғалаба голини урган Корреага ассистентлик қилди. Учинчи турда мадридликлар «Вильярреал»га қарши ўйинда (2:2) очко йўқотди, де Пауль сариқ карточка олди.
Жоржиньо Вейналдум (эркин агент), «Ливерпуль»дан «ПСЖ»га
2020/2021 йилги мавсум статистикаси: 38 ўйин, 2 гол, 1 сариқ карточка.
Топ даражадаги эркин агентлар Парижга келиши давом этади. «Ливерпуль» ва Нидерландия термаси етакчиси Жоржиньо Вейналдум мавсум давомида клубни тарк этишини билдирганди. Лекин унинг режаларида Париж гиганти йўқ эди. Вейналдум «Барселона»да ўйнашни истаган, ёзгача у каталонлар клубида пайдо бўлишига ҳеч ким шубҳа қилмаётганди, аммо сўнгги лаҳзаларда «ПСЖ» варианти пайдо бўлди. Парижликлар унга икки баробар кўп маош таклиф этишди. Нидерландия термаси сардори пойтахт клубида 2024 йилга қадар тўп суради, унинг йиллик маоши миқдори 10 миллион еврога тенг.
У Почеттино учун идеал даражадаги яримҳимоячи – прессинг-киборг, у босим остида тўпни аъло даражада ўзида сақлаб туради, рақиб жарима майдони ҳудудига хавфли узатмалар амалга оширади. Фақат бир жиҳати бор: «ПСЖ» Почеттинонинг аввалги жамоалари каби услубда ўйнайдими? Афтидан, йўқ. Бу ҳолда Жинининг муваффақияти тўла кафолатланмайди.
Жек Грилиш (117,5 млн евро), «Астон Вилла»дан «Манчестер Сити»га
2020/2021 йилги мавсум статистикаси: 27 ўйин, 7 гол, 12 голли узатма.
Грилишнинг трансфери бир жиҳатдан Де Паулникига ўхшаб кетади. Кўп йиллардан буён бирмингемликлар жамоасида етакчи бўлган, жамоа билан Чемпионшипда ҳам жавлон урган англиялик яримҳимоячи ниҳоят гранд клуб сафига ўтди. У 2021 йил ёзидаги энг қимматбаҳо трансфер бўлди. Грилиш 5 август куни «Ман Сити» аъзосига айланиб, 10-рақамли футболкани олди ва олти йиллик шартномага имзо чекди. Жек «шаҳарликлар» сафида тўрт ўйинда майдонга тушиб улгурди, «Норвич»га қарши ўйинда гол урди, «Арсенал»нинг тор-мор этилишида иштирок этиб, бешинчи голда Жезусга ассистентлик қилди. Яримҳимоячи ўзи дунёдаги энг яхши мураббий деб биладиган Гвардиола билан ишлашни жуда истаганини айтди ва «Манчестер Сити» бу мавсумда Чемпионлар лигасида ғолиб бўлишига ишончи комил эканини билдирди.
Ромелу Лукаку (115 млн евро), «Интер»дан «Челси»га
2020/2021 йилги мавсум статистикаси: 44 ўйин, 30 гол, 10 голли узатма.
«Интер» мухлислари Лукакунинг «Челси»га кетишидан қаттиқ норози бўлишди. Бельгиялик форвард инглиз клуби билан беш йиллик шартномага имзо чекди ва Англияга қайтганидан кейинги илк ўйинидаёқ «Арсенал» дарвозасига гол урди.
Лукаку «Челси»га илк бор 2011 йил августида келган, ўшанда Абрамович клуби унинг трансфери учун «Андерлехт»га 15 млн евро тўлаган. Ромелу биринчи уринишда асосий таркибга кира олмаган, бир неча йилни «Вест Бромвич» ва «Эвертон»да ижара асосида ўтказган. 2014 йил ёзида «Эвертон» «Челси»га 35 млн евро тўлаб, унинг трансфер ҳуқуқини сотиб олган. Кейинроқ ҳужумчи Англиянинг бошқа бир жамоаси - «МЮ»да ҳам ўйнаган, 2019 йилда Италияга кетганди. Кўклар ушбу футболчини ёзнинг энг қиммат иккинчи трансферини амалга оширган ҳолда қайтаришди, аммо Лукаку ўзига тўланган пулларни оқлашига шубҳа йўқ.
Лионель Месси (эркин агент), «Барселона»дан «ПСЖ»га
2020/2021 йилги мавсум статистикаси: 47 ўйин, 38 гол, 14 голли узатма.
Улкан молиявий муаммолар туфайли «Барселона» Месси билан янги шартнома туза олмади. Дунё миқёсидаги юлдуз футболчисини таркибда сақлаб қолиш учун қилинган бир неча ҳаракатдан кейин кўк-анорранглилар тақдирга тан беришди ва аргентиналик футболчини қўйиб юборишди. Футболчи учун асосий даъвогарлар «ПСЖ» ва «Манчестер Сити» эди, Месси Францияга йўл олишга қарор қилди.
29 август куни «Барселона»нинг собиқ форварди «ПСЖ»нинг «Реймс»га қарши ўйинида ушбу чемпионатдаги дебютини амалга оширди. Месси ўйинга тез қўшилиб кетди ва парижликларнинг бир неча хавфли ҳужумларида қатнашди, аммо дарвоза сари аниқ зарба йўлламади. «Лео яхши ўйнади. У ҳали ўзининг энг юқори формасидан узоқ, аммо у яхши шуғулланмоқда ва халқаро ўйинлардан кейин топ даражага қайтади», — деди «ПСЖ» бош мураббийи Почеттино.
Криштиану Роналду (15 млн евро), «Ювентус»дан «Манчестер Юнайтед»га
2020/2021 йилги мавсум статистикаси: 44 ўйин, 36 гол, 4 голли узатма.
Роналдунинг «Олд Траффорд»га қайтиши амалга ошди. Криштиану камбэкни Фергюсонга бағишлади ва «қизил иблислар» билан икки йиллик шартнома имзолади. «Манчестер Юнайтед» португалиялик футболчи ўзининг севимли еттинчи рақамли футболкасида ўйнаши учун (ўтган мавсумда бу рақам Эдинсон Каваниники эди) Премьер-лигадан рухсат олди. Кавани эса миллий жамоада бўлгани каби 21-рақам остида ҳаракатланади (аввалроқ клуб Дениел Жеймсни «Лидс»га сотиб, бу рақамни бўшатганди).
Роналду шу кунларда Португалия термаси билан ЖЧ-2022 саралашида Ирландия дарвозасига дубль қайд этиб, терма жамоа сафидаги голлари сонини 111тага етказган ва эронлик Али Дайининг рекордини янгилаб, миллий жамоалар миқёсида энг кўп тўп киритган футболчига айланиб олганди. Аммо у шу ўйинда иккинчи голини нишонлаш вақтида футболкасини ечгани учун сариқ карточка олди ва сариқ карточкалар лимити боис 7 сентябрда бўлиб ўтадиган Озарбойжонга қарши ўйинни ўтказиб юборадиган бўлди, шу сабабли у жамоа базасини тарк этди. Унинг «Олд Траффорд»га қайтиши сентябрнинг иккинчи ярмида рўй беради.
Захира
Фикайо Томори (29,2 млн евро), «Челси»дан «Милан»га
2020/2021 йилги мавсум статистикаси: 17 ўйин, 1 гол.
Италия клублари кутилмаган трансферлар амалга оширишда давом этди. Шундай трансферлардан бири Фикайо Томорининг «Милан»га ўтиши бўлди. Бу ҳимоячи «Челси»да тарбияланган, қатор клубларга ижарага берилган ва асосий жамоада вақти келишини кутган. У айрим мавсумларда жамоада қолиб, қатор ўйинларда иштирок этган. Январда эса Фикайо «Милан»га сотиб олиш ҳуқуқи билан 2 млн еврога ижарага берилди. Англиялик футболчилар Италия чемпионатида ўйнашини яқин-яқинларгача тасаввур қилиш қийин эди. Аммо бу ҳимоячи барча стереотипларга терс тарзда, янги лигада тез мослашиб кетди ва клуб у учун қарийб 30 млн еврони аямади.
Янги мавсумда «Милан» кўп йиллардан бери илк бор барча фронтларда иштирок этади — А Серияда, Италия Кубогида ва Чемпионлар лигасида. Шундай экан, 23 ёшли Томори кўп ўйин амалиётига ва янада ўсишда давом этиш имкониятига эга бўлади.
Жейдон Санчо (85 млн евро), «Боруссия» Дортмунддан «Манчестер Юнайтед»га
2020/2021 йилги мавсум статистикаси: 38 ўйин, 16 гол, 20 голли узатма.
21 ёшли вингер Бундеслигада сўнгги мавсумларни жуда кучли ўтказди ва футболнинг ҳозирги авлодидаги ёрқин юлдузлардан бирига айланди. Санчо «Манчестер Сити» тарбияланувчиси ҳисобланади, шу туфайли у «Юнайтед»га ўтгач, «қизил иблислар» жамоаси мухлислари ўзларининг азалий рақибларини мазах қилиш учун Жейдоннинг сурати акс этган қуйидагича ёзувли баннерни кўтаришди: «Тўғри йўлдаги Манчестерга хуш келибсан». Англиялик футболчи «тўғри йўлдаги Манчестер» билан беш йиллик шартнома имзолади ва 25-рақамли футболкани танлади.
Ушбу яримҳимоячи Англия чемпионати стартидаги уч ўйинда ҳам майдонга тушди, аммо у ҳозирча «МЮ» футболкасида гол ёки голли узатма муаллифи бўлгани йўқ. Сульшер у спорт формасини тўлиқ тиклмаган деб ҳисоблаб, уни фақат захирадан ўйинга туширмоқда: «Жейдонда Евродан кейин кичик таътил бўлди, кейин эса соғлигида кичик муаммолар кузатилди. У биз билан барча машғулотларда иштирок этмади. У формасини тиклашини кутишимиз керак. Аммо мавсум давомида Санчо биз учун жуда муҳим футболчига айланади», — деди мураббий.
Мемфис Депай (эркин агент), «Лион»дан «Барселона»га
2020/2021 йилги мавсум статистикаси: 40 ўйин, 22 гол, 12 голли узатма.
Нидерландия термаси ҳужумчиси кўк-анорранглилар билан икки йиллик шартномага имзо чекди ва келиши биланоқ клуб етакчисига айланди. Стартдаги уч учрашувда Депай икки гол урди ва бир голга узатма берди. Месси кетгач Мемфис жамоанинг асосий юлдузи бўлиб қолди ва бу амалда ҳам кузатилмоқда. У Примерадаги илк самарали ҳаракатини майдонга тушишидан 19 дақиқа ўтиб амалга оширди. «Барселона»даги молиявий муаммолар туфайли ушбу ҳужумчи дастлабки келишувда назарда тутилганидан 30 фоиз камроқ маош олишга розилик берган.
Антуан Гризманн, ижара, «Барселона»дан «Атлетико»га
2020/2021 йилги мавсум статистикаси: 51 ўйин, 20 гол, 13 голли узатма.
«Барса»нинг йўқотишлари бир Месси билан чегараланиб қолмади. Гризманн ҳам «Камп Ноу» билан чиқишиб кета олмади ва ўзини бахтиёр қиладиган жонажон клубига қайтди. Ҳозирча ижарага. Клублар ўртасидаги келишувга кўра мадридликларда мавсум якунида футболчини сотиб олиш ҳуқуқи бор. «Атлетико» учун бу ҳар қанақасига фойдали трансфер бўлади: икки йил олдин 120 млн еврога сотилган футболчи кейинги ёзда 40 млн евро эвазига қайтиши мумкин. Қолаверса, француз футболчиси ҳали энди 30 ёшда. Журналист Никола Ширанинг ёзишича эса футболчи билан 2026 йилга қадар шартнома тузиш бўйича келишувга эришилган. У бу муддат ичида мадридликлар билан Испания чемпионатида ҳам, ЕЧЛда ҳам ғолиб бўлиши мумкин (унда ҳали бу совринлар йўқ).
Элдор Шомуродов (17,5 млн евро), «Женоа»дан «Рома»га
2020/2021 йилги мавсум статистикаси: 31 ўйин, 8 гол, 1 голли узатма.
Шомуродов «Женоа»да кечган бир мавсумдан кейин янги босқичга чиқди ва Жозе Моуриньо қўли остида шуғулланадиган бўлди. Генуяликлар ўзбек футболчиси трансферидан яхшигина маблағ ишлаб олишди, унинг трансфери «Ростов»га ҳам 1,5 млн евро келтирди. 26 ёшда бўлган Элдор янги клубида совринлар ютиш мақсадида эканини айтди.
«Рома»да Элдор асосий ҳужумчи бўлмайди, «Интер»га Лукаку ўрнини тўлдириш учун кетган Эдин Жеко ўрнига Моуриньо «Челси»дан Тэмми Абраҳамни олиб келди. Ўзбекистонлик форвард мавсумолди тайёргарлик йиғинлари доирасидаги ўртоқлик ўйинларида ўзининг тўпурарлик салоҳиятини намойиш этди, қолаверса, Конференциялар лигасида «Трабзонспор»га қарши сафар ўйинида ғалаба голига муаллифлик қилиб, римликларнинг гуруҳ босқичига чиқишига ҳисса қўшди. Аммо у А Серия ўйинларида бошланғич таркибда тушмаяпти - биринчи турда «Фиорентина»га қарши ўйинда 21 дақиқа ўйин амалиётига эга бўлиб, 1 голга узатма берди, «Салернитана»га қарши ўйинда эса 13 дақиқа ўйнади. У Моуриньо учун идеал даражадаги ротация ўйинчиси бўлади.
