Жанубий Корея Google’га 177 млн доллар жарима солди

Фото: Reuters

Жанубия Корея антимонопол ташкилоти АҚШнинг Google компаниясини мобил операцион тизимлар ва дастурлар бозоридаги етакчилигини суиистеъмол қилгани учун 207,4 млрд вон (176,8 млн доллар) миқдорида жаримага тортди. Бу ҳақда Yonhap ахборот агентлиги хабар берди.

Маълумотларга кўра, Google смартфонлар ишлаб чиқарувчи компаниялардан ўз қурилмаларига Android операцион тизимининг модификация қилинган версияларини ўрнатишни тақиқловчи келишув тузишни талаб қилиб, рақобатчиликка тўсқинлик қилган. Бу эса смартфонлар учун янги операцион тизимларни яратишдаги инновацион фаолиятни юритишга тўсқинлик қилган.

Google’га жаримадан ташқари, камчиликларни тўғрилаш, жумладан смартфонлар ишлаб чиқарувчи компаниялар билан келишувларга тегишли ўзгартиришлар киритиш мажбурияти қўйилган. Таъкидланишича, ушбу чоралар “мобил операцион тизимлар ва дастурлар бозоридаги рақобатни тиклашга замин яратишда ёрдам беради”.

Аввалроқ Франция Google’га 500 млн евро жарима солганди. АҚШ компанияси Франция мутасадди идораларининг матбуот контентидан фойдаланиш борасидаги талабини бажармагани учун жазоланган.

#Google #Жанубий Корея