Август ойида ўзбекистонликларнинг уй сотиб олиш кўрсаткичи 20,6 фоизга ошган

Август ойида Ўзбекистонда кўчмас мулк олди-сотдиси бўйича 21,8 минг дона шартнома расмийлаштирилган. Бу июль ойига (18,1 минг) нисбатан 20,6 фоизга кўп.

Иқтисодий тадқиқотлар ва ислоҳотлар маркази таҳлилларига кўра, жорий йилнинг август ойида Ўзбекистонда кўчмас мулк олди-сотдиси бўйича 21,8 минг дона шартнома расмийлаштирилган. Бу июль ойига (18,1 минг) нисбатан 20,6 фоизга кўп. Шу билан бирга, 2020 йилнинг мос даврига (15,6 минг) нисбатан ўсиш 39,5 фоизни ташкил этмоқда.

Жорий йилнинг июль ойига нисбатан барча ҳудудларда ўсиш кузатилган.

Хусусан, кўчмас мулк олди-сотдисининг энг юқори ўсиш суръатлари Бухоро (37,4 фоиз), Қашқадарё (33,1 фоиз), Андижон (31,5 фоиз) ва Сурхондарё (25,9 фоиз) вилоятларида қайд этилган.

Кўчмас мулк бозорида битимлар сони кўпайишининг асосий сабаблари сифатида эпидемиологик вазиятнинг яхшиланиши ва иқтисодиётга босим ўтказадиган карантин чекловларининг енгиллаштирилиши, оммавий эмлаш, таътил мавсумининг тугаши ва фаол иш мавсумининг бошланиши каби омиллар кўрсатилган.