ЕТТБ ва ХМК Ўзбекистондаги TBC Bank акцияларини сотиб олади

Европа тикланиш ва тараққиёт банки (ЕТТБ) ҳамда Халқаро молия корпорацияси (ХМК) Грузиядаги энг йирик банклар гуруҳи бўлмиш TBC Bank Group’нинг шуъба корхонаси - TBC Bank Uzbekistan (TBC UZ) акцияларини сотиб олиб, ўзбек банк секторида хусусий сектор иштироки ортишини рағбатлантирмоқда.

Икки институционал инвестор - ЕТТБ ва ХМК TBC Uzbekistan’да 20 фоиздан улуш сотиб олишни режалаштирмоқда. Инвестициялар бозорда янги ташкил этилган хусусий ўйинчининг операцион фаолиятини янада оширади ва соҳада корпоратив бошқарувнинг халқаро стандартларини илгари суради.

Биринчи тўлов 2022-2024 йиллар мобайнида капитални янада кўпайтиришни қўллаб-қувватлаш мақсадида ҳар икки инвесторнинг ҳар бири учун 9,4 миллион долларни ташкил қилади.

ЕТТБ ваколатхона раҳбари Алкис Дракинос бу 2017 йилда ЕТТБнинг мамлакат билан ҳамкорлиги янгиланганидан буён Ўзбекистонда банк секторида акциядорлик капиталига биринчи сармоя бўлишини қайд этди.

«Бизни йигирма йил давомида қўллаб-қувватлаган ХМК ва ЕТТБ билан узоқ йиллик муваффақиятли ҳамкорлик тарихи бор. Мен ЕТТБ ва ХМКга ҳамкорликнинг янги босқичини бошлаганидан миннатдорман. Бу биргаликдаги фаолият Ўзбекистондаги фаолиятимиз кенгайишининг яна бир муҳим босқичини кўрсатади, бу мамлакатда ишимиз ўсиш суръатларини тезлаштириш ва ўзбекистонликларга инновацион ҳамда ҳамёнбоп маҳсулотлар ассортиментини кенгайтириш имконини беради. TBC UZ мобил илова орқали чакана банк ечимларини таклиф қиладиган Space платформасидаги инновацион fintech асосида муваффақиятли ишламоқда», деди TBC Bank бош ижрочи директори Вахтанг Буцхрикидзе.