ЕТТБ Ўзбекистон иқтисодиёти 2026 йилда 6,5 фоизга ўсишини прогноз қилди

Марказий Осиё ва Мўғулистонда 2026 йил бошида юқори иқтисодий фаоллик сақланиб қолди, аммо аста-секин мўтадиллашиш белгилари кўринмоқда, дейилади Европа Тикланиш ва тараққиёт банкининг минтақага оид янги ҳисоботида.

Қайд этилишича, минтақада кучли ички истеъмол ва инвестициялар ўсишни қўллаб-қувватлашда давом этмоқда. Хизматлар соҳаси қурилиш ва ишлаб чиқариш билан бирга асосий омиллар бўлиб турибди.

“Яқин Шарқдаги можароларнинг чўзилиши туфайли салбий таъсирлар кучайди, бу эса минтақанинг энг йирик савдо ва иқтисодий ҳамкорлари – Россия ва Хитойда энергия нархларининг ўзгарувчанлиги, таъминот занжиридаги узилишлар ва ўсишнинг секинлашишига олиб келди.

Умуман олганда, ўсиш истиқболлари мустаҳкам бўлиб қолмоқда, аммо истиқболлар тобора кўпроқ ички ислоҳотлар суръатига ва ташқи зарбаларга чидамлиликни кучайтиришга қаратилган саъй-ҳаракатларга боғлиқ бўлиб бормоқда”, – дейилади ҳисоботда.

Ўзбекистон

Расмий рақамларга кўра, Ўзбекистон иқтисодиётининг ўсиш суръати 2026 йилнинг биринчи чорагида янада тезлашган. Реал ЯИМ ўтган йилнинг шу даврига нисбатан 8,7 фоизга ошган.

ЕТТБ бу ўсишни биринчи навбатда ички истеъмол билан боғлаган. Пул ўтказмаларининг кўпайиши ва иш ҳақларининг ўсиши хизматлар соҳасини рағбатлантирган. Шунингдек, саноат ишлаб чиқариши 8 фоизга, қурилиш соҳаси эса 15,5 фоизга ўсган.

Банк Ўзбекистон иқтисодиёти 2026 йилда 6,5 фоизга, 2027 йилда эса 6 фоизга ўсишини прогноз қилмоқда. Хусусийлаштириш жараёнлари кутилгандан тезроқ кечса, ўсиш суръатлари юқорироқ бўлиши мумкин. Асосий хавфлар сифатида Россия иқтисодиётида эҳтимолий секинлашув ва Яқин Шарқдаги можаро таъсирида инфляция босимининг кучайиши кўрсатилган.

Қозоғистон

ЕТТБ Қозоғистон иқтисодиёти 2026 йилда 4,7 фоизга, 2027 йилда эса 4,5 фоизга ўсишини кутмоқда.

Йилнинг биринчи чорагида қурилиш, транспорт ва саноат тармоқлари ўсишни сақлаб қолган. Бироқ Каспий қувур консорциуми инфратузилмасидаги узилишлар ва Тенгиз конидаги ҳодиса туфайли қазиб чиқариш саноати 11,4 фоизга қисқарган.

Банк мамлакат иқтисодиёти учун нефт нархларининг ўзгарувчанлиги, нефт экспорт йўлларидаги эҳтимолий узилишлар ҳамда Россия ва Хитой иқтисодиётларидаги секинлашувни асосий хавфлар сифатида баҳолаган.

Қирғизистон

Қирғизистон минтақадаги энг юқори иқтисодий ўсиш кўрсаткичини сақлаб қолади. ЕТТБ мамлакат иқтисодиёти 2026 йилда 8,7 фоизга, 2027 йилда эса 7 фоизга ўсишини прогноз қилмоқда.

Йил бошида иқтисодий фаоллик саноат, қурилиш ва савдо ҳисобидан юқори бўлган. Асосий капиталга инвестициялар 25,5 фоизга ошган.

Шу билан бирга, Европа Иттифоқининг Россияга қарши санкцион режим доирасида Қирғизистонга киритган иккиламчи санкциялари мамлакат иқтисодиётига босим ўтказиши мумкин. Апрел ойи охирида тасдиқланган 20-санкциялар пакети билан, Евроиттифоқдан Қирғизистонга икки томонлама мақсадда фойдаланиш мумкин бўлган товарлар экспорти тақиқланди; шунингдек, молия ва логистика соҳалари бўйича назорат кучайтирилди.

Бундан ташқари, юқори энергия нархлари ва Россияда иқтисодий қийинчиликларнинг кучайиши эҳтимоли Қирғизистон учун қўшимча рискларни яратади.

Тожикистон

Тожикистон иқтисодиёти биринчи чоракда тахминан 8 фоизга ўсган. Бунга савдо, транспорт, алоқа, саноат ва электр энергияси ишлаб чиқариш ҳажмининг ошиши ҳисса қўшган.

ЕТТБ мамлакат иқтисодиёти 2026 йилда 7,9 фоизга, 2027 йилда эса 7 фоизга ўсишини кутмоқда.

Банк Тожикистоннинг асосий заиф томони сифатида Россия иқтисодиётига юқори даражада боғлиқлигини қайд этган. Россиядаги иқтисодий секинлашув меҳнат мигрантлари юборган пул ўтказмалари ҳажмига салбий таъсир кўрсатиши мумкин.

Туркманистон

Расмий маълумотларга кўра, Туркманистон иқтисодиёти биринчи чоракда 6,3 фоизга ўсган. Нефт-газ соҳасида режалаштирилган кўрсаткичлар ошириб бажарилган, қурилиш соҳасини эса давлат инвестициялари қўллаб-қувватлаган.

ЕТТБ мамлакат иқтисодиёти 2026 ва 2027 йилларда ҳам 6,3 фоиздан ўсишини прогноз қилмоқда.

Банкнинг қайд этишича, Туркманистон газ экспортининг катта қисми Хитой бозорига тўғри келади ва бу мамлакатни Хитойдаги талаб ўзгаришларига нисбатан сезгир қилади.

Аввалроқ Fitch Ўзбекистоннинг рейтинги бўйича прогнозни “барқарор”дан “ижобий”га оширган эди.