Ҳафта ўйинлари: «МЮ» «Олд Траффорд»да яксон этилди, Испанияда нотенг класико

Сульшер ва Роналду учун қўрқинчли туш

Англия чемпионати. 9-тур
«Манчестер Юнайтед» — «Ливерпуль» — 0:5 (0:4)
Голлар: Кейта, 5 (0:1). Диогу Жота, 13 (0:2). Салоҳ, 38 (0:3). Салоҳ, 45+5 (0:4). Салоҳ, 50 (0:5).
«Манчестер Юнайтед»: де Хеа, Шоу, Магуайр, Линделёф, Ван-Биссака, Фред, Бруну Фернандеш (Кавани, 63), Мактоминай, Криштиану Роналду, Рэшфорд (Далот, 62), Гринвуд (Погба, 46).
«Ливерпуль»: Алиссон, ван Дейк, Робертсон, Александр-Арнолд, Конате, Милнер (Жонс, 27), Ж.Ҳендерсон, Кейта (Окслейд-Чемберлен, 64), Роберто Фирмино (Мане, 76), Салоҳ, Диогу Жота.
Огоҳлантиришлар: Шоу, 41. Фред, 45+2. Криштиану Роналду, 45+3. Бруну Фернандеш, 46. Магуайр, 55. Ван-Биссака, 86.
Четлатиш: Погба, 60.
Ҳакам: Тэйлор.
24 октябрь. Манчестер. «Олд Траффорд» стадиони.

Афтидан, Оле Гуннар Сульшер учун мураббийлик фаолиятидаги энг оғир дамлар келди: «Манчестер Юнайтед» «Ливерпуль» билан ўйингача 8 ўйиннинг 4тасида мағлуб бўлди, олдинда — «Тоттенҳэм», «Аталанта» ва «Манчестер Сити», энди эса «Ливерпуль» «Олд Траффорд»да қатл маросими ўтказди, манкунианликлар ушбу жамоа билан қарама-қаршиликлар тарихидаги энг йирик мағлубиятини қабул қилиб олди.

Клопп жамоаси мезбонларни ўйин бошидаёқ нокдаунга учратди: 13-дақиқага келиб икки тўп фарқи юзага келди. Ўтган мавсумда асосий таркибдан муқим ўрин эгаллай олмаган ва қаторасига икки ўйинда қатнашиши ноёб ҳолат бўлган Наби Кейта бу мавсумда қаторасига иккинчи ўйинда гол урди. Муҳаммад Салоҳ мавсумдаги голли узатмалари сонини бештага етказди. Иккинчи гол эса Трент ва Диогу Жота томонидан уюштирилди: биринчиси тўпни қанотдан узатиб берди, иккинчиси унга бир тегиниш билан дарвозани ишғол қилди.

«Манчестер Юнайтед» «Аталанта» билан ўйинда ҳам (3:2) биринчи бўлим давомида 0:2 ҳисобида ортда борган, аммо ўша ўйинда «қизил иблислар»нинг ҳужум чизиғи анча қизиқарли кўринганди. «Ливерпуль» билан ўйинда ҳам «МЮ» вақти-вақти билан ҳужумга ўтиб турди, аммо амалда жиддий таҳдид кузатилмади.

Лекин меҳмонлар тўхташни хаёлларига ҳам келтиришмади. Яккама-якка вазиятни йўққа чиқарган Салоҳ ўйиндан узилиб қолмади ва бир неча дақиқа ўтиб барибир ниятига эришди. Наби Кейта қарзини қайтариб, тўпни дарвоза қаршисидаги шеригига етказиб берди, мисрлик ҳужумчи қаторасига ўнинчи ўйинда гол урди.

Биринчи бўлим якунланиши арафасида Алиссон дарвозаси олдида кескинлик юзага келди, аммо бу эпизод «Ливерпуль» дарвозабонининг сэйви билан эмас, Криштианунинг асаблари дош бермагани билан ёдда қолди: Жонс тўп учун курашда Роналдудан устун келди, португалиялик футболчи эса газонда ётган Жонсдан тўпни олиб қўйиш учун уни тепа бошлади. Арбитр Тэйлор сариқ карточка билан кифояланди, «Ливерпуль» яна бир гол билан жавоб қайтарди. Салоҳ бўлимга қўшиб берилган бешинчи дақиқада дублни расмийлаштирди.

Биринчи голи 29 ёшли форвардга Премьер-лига тарихидаги энг яхши африкалик тўпурар бўлиб олиш имконини берди. Танаффусга қадар у АПЛдаги голлари сонини 106тага етказди — 104 гол билан биринчи бўлиб турган Дидье Дрогба ортда қолдирилди (лекин у лигада Салоҳдан 87та камроқ ўйин ўтказган).

Танаффусда Сульшер АПЛнинг энг яхши ассистенти бўлиб турган Поль Погбани майдонга ташлади. Аммо бу ҳам ёрдам бермади. «Юнайтед» футболчилари фоллар ва карточкаларни коллекция қила бошлашганида (41-дақиқадан 46-дақиқагача Тэйлор тўртта сариқ карточка кўрсатди), «Ливерпуль» танаффусга чиқмагандек ўйин кўрсатди. Ҳендерсон битта пас билан «Манчестер Юнайтед» ҳимоясини доғда қолдирди ва Салоҳни Хеа билан яккама-якка вазиятга чиқарди, мисрлик футболчи эса ҳет-трикни расмийлаштирди ва АПЛдаги голлари сонини 107-тага етказди. «Олд Траффорд» трибуналари ҳакам ҳуштаги чалинишидан анча олдинроқ бўшай бошлади.

Де Хеа эса қийин дақиқаларни ўтказди — ўйин сўнггига қадар у яна бир қанча сейвлар амалга ошириб, жамоасини муқаррар голлардан қутқарди. У «Манчестер Юнайтед» фанатлари бу ўйинда эътироз билдирмаслиги керак бўлган ягона ўйинчи эди.

5:0 — Юрген Клоппнинг «Ливерпуль» бошқарувидаги 200-ғалабасига айланди. Қизиллар «Челси» ортидан иккинчи ўринда бормоқда, «Манчестер Юнайтед» турнир жадвалининг 7-ўрнида қолди.

Англия: Тухель ва Гвардиола йирик ҳисобларда ғалаба қилди

«Челси» — «Норвич» — 7:0 (Маунт, 8, 85, пенальти, 90+1. Ҳадсон-Одои, 18. Жеймс, 42. Чилуэлл, 57. Ааронс, 62, автогол)

Чемпионлар лигасида камтаргина «Мальмё» устидан қозонилган ғалаба лондонликларга қимматга тушганди - Лукаку ва Вернер жароҳат олиб сафдан чиқди. Аммо Томас Тухелга муваффақият учун ҳужумчи шарт бўлмади. Айниқса ҳозирданоқ чемпионшип йўлланмаси учун асосий даъвогарга айланган «Норвич»га қарши ўйинда. «Канарейкалар» тўққиз турда атиги икки очко жамғаришди ва жамоадаги ҳолат умидсиз кўринмоқда.

«Стэмфорд Бриж»даги ўйин АПЛ етакчиси ва турнир аутсайдери ўртасидаги фарқ қанчалар чуқур эканини кўрсатди. Маунт ва Ҳадсона-Одоининг тезкор голлари «Челси» сафида исталган футболчи гол ура олиши ҳақидаги аксиомани яна бир бор тасдиқлади. Бу иккиси билан бирга лондонликлар сафида мавсум бошидан буён Англия чемпионати ўйинларида камида битта гол урган футболчилар сони 15 кишига етди. Агар барча турнирлар ҳисобга олинса, бомбардирлар сони, автоголлар ҳисобга олинмаган тақдирда, 17 нафарни ташкил этади.

Шусиз ҳам қийин аҳволда бўлган «Норвич»да 65-дақиқада ҳимоячи Гибсон иккинчи сариқ карточкани олди ва ўйин меҳмонларнинг ерга урилиши билан якунланди. Тухель келганидан кейинги даврда жамоанинг асосий тўпурари бўлиб турган Маунт (9) ҳет-трик расмийлаштирди.

«Брайтон» — «Манчестер Сити» — 1:4 (Мак Алистер, 81, пенальти — Гундўған, 13. Фоден, 28, 31. Маҳрез, 90+5)

«Чайкалар»нинг бу мавсумда кучли тўртликка кириб олишига кўпчилик кўникканди, аммо турнир жадвалида «Брайтон» билан ёнма-ён турган амалдаги чемпион орадаги асл фарқни кўрсатиб  қўйди. Ўтган мавсум сўнггида Грэм Поттер жамоаси икки тўп фарқини йўққа чиқариб, «Сити» устидан ғалабага эришганди (3:2), аммо бу сафар рақибга жиддий қаршилик кўрсатилмади.

Майдон эгалари ўйинда ҳисоб очилган вазиятда ҳакамликдан норози бўлишди, Гундўғаннинг голи олдидан қоида бузилганини иддао қилишди. Аммо VAR дарвозабон хато қилгани ва гол тўғри инобатга олинганини тасдиқлади. Шундай экан, «шаҳарликлар» яримҳимоячиси АПЛда 30та голлик довондан ўтган германиялик футболчилар рўйхатида фақат Озилдан ортда қолиб, иккинчи ўринга чиқди, Фоденнинг дублидан кейин ўйинда интрига қолмади.

Хосеп Гвардиола жамоаси ўйиннинг иккинчи қисмини ҳаддан ташқари прагматик ўтказди, бўлим охирларида «Брайтон» пенальти орқали ҳисобни қисқартиришга эришди. Лекин бу гол чемпионларни уйғотишга хизмат қилди ва жамоа яна бутун куч билан олдинга тшланиб, ўйин охиригача ҳисобни яна йирик кўринишга келтиришди.

«Вест Ҳэм» Чемпионлар лигаси зонасида

«Брентфорд» — «Лестер» — 1:2 (М.Йергенсен, 60 — Тилеманс, 14. Мэддисон, 73)

Кадрлар барчасини ҳал қилади, бу ҳақиқатни «Лестер» яна бир бор тасдиқлади. «Тулкилар» аввалига чўлоқланаётганди, аммо Брендан Роджерс шогирдлари ўзига келиб олди ва сўнгги турларни юқори суръатларда ўтказмоқда. «МЮ» устидан қозонилган ғалаба ортидан Европа Лигасида сафарда «Спартак» дарвозасига тўрт гол урилди, энди АПЛнинг курашдан толмас янги аъзосига қарши оддий бўлмаган ўйинда натижага эришилди. «Лестер» ҳамон турнир жадвали ўрталарида қолмоқда, аммо бешинчи ўриндаги «Брайтон» билан орадаги фарқ атиги бир очко.

«Вест Ҳэм» — «Тоттенҳэм» — 1:0 (Антонио, 72)

Бу турдаги Лондон дербисида ғалаба қозонган «болғачилар» Чемпионлар лигаси квартетида мустаҳкамланиб олишди. Дэвид Мойес шогирдлари ўзаро баҳсда мағлуб этилган «Тоттенҳэм» ҳамда бу турда йирик ҳисобда ютқазган «МЮ» билан орадаги фарқни оширди. Учрашув аввалида кўпчилик Кейндан ёрқин ўйин ўтказишини кутишганди, у бу ўйинда жамоасини АПЛда 250-ўйинида майдонга бошлаб чиққанди, аммо якшанба кун қаҳрамони бошқа футболчи бўлди. Антониони оқшомнинг кутилмаган триумфатори дейиш қийин, чунки «шпорлар» унинг учун севимли рақибга айланган. Ҳужумчи бу рақиб дарвозасига олтинчи марта гол урди, у сўнгги уч учрашувда барқарор равишда «Тоттенҳэм» дарвозасини ишғол этмоқда. «Вест Ҳэм»нинг ғалабаси ўйинга мос бўлди, иккинчи бўлимда майдон эгалари дарвозасига бирорта зарба берилмади.

Мўъжиза рўй бермади — класико Мадрид фойдасига ҳал бўлди.

«Барселона» — «Реал» — 1:2 (0:1)
Голлар: Алаба, 32 (0:1). Васкес, 90+4 (0:2). Агуэро, 90+7 (1:2).
«Барселона»: тер Штеген, Пике, Жорди Альба, Гарсия, Мингеса (Коутиньо, 46), Дест, Бускетс, Ф.де Йонг (Сержи Роберто, 77), Гави (Л.де Йонг, 85), Депай, Фати (Агуэро, 74).
«Реал»: Куртуа, Алаба, Менди, Эдер Милитау, Модрич, Кроос, Каземиру, Бензема, Васкес, Винисиус Жуниор (Асенсио, 88), Родригу (Вальверде, 72. Карвахаль, 90+2).
Огоҳлантиришлар: Пике, 58. Менди, 80.
Ҳакам: Санчес Мартинес (Испания).
24 октябрь. Барселона. «Камп Ноу» стадиони.

Бир неча йил муқаддам футбол олами Криштиану Роналдусиз класикога кўникканди. Энди Месси ва Серхио Рамоссиз (бу футболчилар испан футболидаги асосий ўйиннинг 45тасида қатнашган ҳолда рекорд қўйишган) ҳаёт бошланди. Якшанба кунги «Камп Ноу»даги ўйин арафасида энди кимлар янги қаҳрамонлар бўлишини кутишарди. 

Каталонияда авлодлар алмашинуви давом этмоқда. Бу сафарги ўйинда класикодаги дебютини амалга оширган 17 ёшли Гави сўнгги 80 йилликда класикода майдонга тушган энг ёш футболчига айланди. Мадридликлар сафида эса яримҳимояда ҳамон ўша-ўша учлик ҳаракатланмоқда - Модрич, Каземиро ва Кроос. Ўйиндан олдин Роналд Куман ўз жамоасида ҳам ёшларга ёрдам бериб, улар илк дақиқаларданоқ қўрқмай ўйнашини таъминлай олувчи қатор тажрибали футболчилар борлигини айтиб ўтди.

Дастлабки ўн дақиқаликда «Барса» нафақат дадиллик билан, балки ақлли ҳам ўйнади. Тўп уларнинг назоратида бўлди, бу вақтда «Реал» майдоннинг рақиб қисмига ўта олмай ҳам қолди. Кейин ўйин ўзгара бошлади, лекин бу принципиал ўзгариш эмасди, тартиблилик ва ташкилийлик биринчи ўринга чиқди. Винисиус — академик услубдан бразилча ўйинга қайтишда биринчилардан. Унинг қанотдаги финтларига Мингес тайёр эмаслиги яна бир бор кўриниб қолди, ҳимоячи форвардни жарима майдони ичида қувиб етганида у биринчи контактдан кейиноқ йиқилиб берди. Аммо «Реал»га пенальти берилмади.

Кейин Дестнинг узоқ вақтгача ёдда қолувчи ноаниқ зарбаси рўй берди. Терма жамоа сафида шедевр голлар уриб юрувчи америкалик футболчи жарима майдони марказида, дарвозадан тўққиз метр масофада туриб тўпни трибунага қарата тепди. Кейин эса мадридликлар тажрибадаги фарқни намойиш этишди, ўз жамоаси жарима майдони яқинида тўпни эгаллаган Алаба ҳужумни бошлаб берди ва уни ўзи узоқ бурчани аниқ нишонга олган ҳолда якунлади — тер Штеген иложсиз ҳолатда эди. Ўйиндаги биринчи зарба — биринчи гол.

Статистика нуқтайи назаридан «Барса»нинг ғалаба учун имкониятлари дақиқа сайин йўқолиб борди, жамоа охирги марта 1989 йилда уй класикосида биринчи бўлиб гол ўтказган ҳолда ғалаба қозонган. Бу қанчалар олисда рўй берганини тушуниш учун ўшанда каталонияликларнинг иккита жавоб голини айнан Куман урганини келтириш мумкин. Энди нидерландиялик мутахассис мураббий сифатида буни уддалашга ҳаракат қилиши керак эди. Танаффусда ўйин қайтадан қурилди: тезкор Дест Винисиусга қаршилик кўрсатиши учун ортга сурилди, ҳужумни кучайтириш учун Мингеса ўрнига тажрибали Филиппе Коутиньо туширилди.

Бундан мақсад тушунарли эди, аммо реализацияга келганда ҳеч нарса ўзгармади. Азарт ва қайсарлик билан мадридликлар ҳимоясини ҳайратлантириб бўлмасди. Бензема бир неча метр масофадан зарба йўллаган (ноаниқ) каби ҳолатлар «Барса»да юзага келмади. Тактик шахматда Анчелотти устунлик қилди. Италиялик мутахассисда ўнг қанотни кучга тўлган Вальверде билан ёпиш имконияти бўлгани ҳолда, Куман эндигина сафга қайтган Агуэронинг гол сезиш қобилиятига ва иккинчи қаватда тўп учун курашда устунлик қилиши мумкин бўлган Люк де Йонгнинг омади келишига умид қилиши мумкин эди.

Жоан Лапорта томонидан яна бир бор ишонч билдирилган мураббий «Барса»дан ҳозирча мўъжиза кутиш керак эмаслигини айтганди. У бу гапини Чемпионлар лигаси ҳақида айтган бўлса-да, класико — ҳам даража борасида бу турнирдан қолишмайди. У бир йил ичида жамоани иккинчи марта қайтадан қуришига тўғри келмоқда — бу иш молиявий инқироз шароитида олиб борилаётгани эса алоҳида масала. Ўтган мавсумда унинг ихтиёрида Месси ва Гризманн бор эди.

Ҳозир — кучдан қолган фахрийлар ва ҳали етилмаган ёшлар даври. Шунинг учун, каталониялик мухлислар реалликни қабул қилиб, сабрли бўлиши талаб этилади, улар учун ижобий ҳолат ва келажакка умид бериши мумкин бўлган жиҳат, бу сафар жамоа «Бавария» ва «Атлетико»га қарши ўйинларда бўлгани каби иложсиз кўринмади.

Тан олиш керак, 1965 йилдан буён қаторасига тўртинчи класикода ғолиб бўлган «Реал» ҳозир шунчаки бошқа даражада. Қўшимча дақиқаларда «Мадрид» буни намойиш этди, мезбонларнинг хавфли ҳужумига Лукас Васкеснинг голи билан жавоб қайтарилди. Сўнгги дақиқада Агуэронинг кўк-анорранглилар сафидаги дебют голи эса умид учқуни бўлиб қолди.

Суарес «Атлетико»ни қутқарди

«Атлетико» — «Реал Сосьедад» — 2:2 (Суарес, 61, 77, пенальти — Серлот, 7. Исак, 48)

«Камп Ноу»даги класико бошқа ўйинларни соясида қолдириши олдиндан маълум эди, аммо тур арафасида бешинчи ўринда турган ва ҳозирда турнир жадвалида кутилмаганда пешқадамга айланган жамоа ўртасидаги тўқнашувни эътибордан четда қолдириб бўлмасди. Тан олиш керакки, драматизм ва гўзаллик борасида бу учрашув «Барса» ва «Реал»ни сояда қолдирди.

Ўйиннинг биринчи қисмини басклар ўз фойдасига ҳал қилишди, биринчи гол урилишига олиб келган комбинация вақтида тўп майдон марказида рақибдан олиб қўйилди, бир неча аниқ узатмалар амалга оширилди ва якунда Серлот Исакнинг пасини йўққа чиқармади. Швед форварди ўзи ҳам гол урганида эса «Реал Сосьедад»нинг ғалабаси муқаррардек кўринарди.

Аммо ҳеч ким «Атлетико»дан иродани тортиб ололмайди, қолаверса, «матрасчилар» сафида Суарес каби савияли ҳужумчи бор. Уругвайликнинг дубли уни ла лига тарихидаги энг яхши тўпурарлар рўйхатида 15-ўринга яқинлашди. Голлари сонини 171тага етказган форвард тарихий натижага эришиши учун яна 9 гол қолди. Лекин мадридликлар жамоаси «Реал» ва «Севилья» билан тенглаша олмади. Биринчи ўринда эса ҳамон Сан-Себастьяндан бўлган жамоа жойлашган, аммо фаворитлар Жанубий Америкадаги саралаш ўйинлари оқибатларидан бутунлай халос бўлгач, барчаси яна ўз жойига қайтишига шубҳа қилмаса ҳам бўлади.

«Севилья» — «Леванте» — 5:3 (О.Торрес, 8. Рафа Мир, 24. Диегу Карлос, 38. Мунир, 50. Фернандо, 64 — Моралес, 33, 55. Мелеро, 61)

Класико арафасида «Севилья» ла лига етакчисига айланиб олди, «Леванте»га қарши ўйинда ақл бовар қилмас голлар шоуси кузатилди. Барчаси Торреснинг ажойиб голи билан бошланди, бурчак зарбаси ижро этилганида у тўпни тўхтатмасдан дарвоза устуни остига йўллади. Хулен Лопетеги жамоаси сўнгги беш турда тўрт ғалабага эришган ҳолда кучли тўртликда бормоқда.

«Валенсия» — «Мальорка» — 2:2 (Гонсалу Гедеш, 90+3. Гайя, 90+8 — Анхель, 32. Диакаби, 38, автогол)

«Кўршапалаклар» ғалабасиз сериясини давом эттирди (3 дуранг ва 3 мағлубият). Шанба куни меҳмнлар олти дақиқа ичида икки гол уришди, 55-дақиқада мезбонлар сафида Ли Канг Ин майдондан четлатилгач, ўйин тақдири ҳал бўлгандек эди. 

Аммо якунда биринчи бўлиб трибуналарни юз фоизга тўлдириш ҳуқуқига эга бўлган «Месталья» арбитр томонидан қўшиб берилган дақиқаларда ақл бовар қилмас ҳодисаларга гувоҳ бўлди. «Валенсия»ни ўйинга Гонсалу Гедешнинг ўта нозик зарба билан «тўққизлик»ни нишонга олиши қайтарди. Қўшиб берилган саккизинчи дақиқада — «Мальорка» сафида Фера Ниньо қулай вазиятни қўлдан чиқарганидан кейин Гайя Маркос Андренинг узатмасини йиқила туриб голга айлантирди. Мезбонлар сардори бу мавсумда кутилмаганда тўпурарлик қобилиятини намойиш этмоқда. Қаторасига икки ўйинда ўз номини таблога ёздириб қўйган Гайя бунгача Ла Лиганинг 207 ўйинида биттагина гол урганди.

Италияда тур ўйинлари ва турнир жадвали

Германияда тур ўйинлари ва турнир жадвали

Францияда тур ўйинлари ва турнир жадвали