«Арсенал» кубок кўтарди, «Сити» ва «Ливерпул» афсоналари билан хайрлашди

Манчестернинг кўк томони ва Ливерпулнинг қизил томони афсоналарини кузатишди. Хосеп Гвардиола, Бернарду Силва, Жон Стоунз, Энди Робертсон ва Муҳаммад Салоҳ энди «Сити» ва «Ливерпул» либосларида бошқа ўйнашмайди. Лекин ҳар икки жамоа ҳам хайрлашув учрашувларини ғалаба билан якунлай олишмади.

«Манчестер Сити» «Астон Вилла»га қарши ўйинда дастлаб Семенёнинг голи орқали ҳисобни очганига қарамай, иккинчи бўлимда Уоткинснинг ўзидан иккита гол ўтказиб юборди. Ўйин охирларида Фоденнинг ҳисобни тенглаштирувчи голи инобатга олинмади ва «шаҳарликлар» мавсумни мағлубият билан якунлайдиган бўлишди. Шу билан бирга, жамоа бу орқали ўзини чемпионлик пойгасидан чиқариб юборган «Борнмут»дан ўзига хос тарзда қасос олишди. «Астон Вилла»нинг ғалабаси Андони Ираола шогирдларини ЕЧЛ йўлланмасидан маҳрум этди.

«Ливерпул» эса уйда «Брентфорд» билан дуранг (1:1) ўйнади ва кейинги мавсум ЕЧЛда иштирок этадиган бўлди. Ўйиннинг биринчи бўлимида ҳисоб очилмади, иккинчи бўлим бошида эса шу куни клуб сафида сўнгги ўйинини ўтказаётган Муҳаммад Салоҳ Жонсга ассистентлик қилиб, яна бир клуб рекордини ўрнатди – у АПЛ ўйинларидаги голли паслари сонини 93 тага етказиб, бу борада Стивен Жеррарднинг натижасини яхшилади. Мезбонлар ғалабани сақлаб қола олишмади: Кевин Шаде бироз ўтиб ҳисобни тенглаштирди, қолган дақиқаларда мерсисайдликлар собиқ дарвозабони Келлеҳерга бошқа гол ура олишмади.

Ўйин охирларида Салоҳ ва Робертсон «Энфилд»да йиғилган мухлисларнинг олқишлари остида захирага олинди.

Фернандешда рекорд

«Брайтон» – «Манчестер Юнайтед» 0:3
Голлар: Доргу, 33 (0:1). Мбемо, 44 (0:2). Бруну Фернандеш, 48 (0:3)
«Брайтон»: Вербрюгген, Данк, ван Ҳекке, Ферди Кадиўғли, Виффер, Милнер (Балеба, 59), Грос, Ҳиншелвуд (Рюттер, 74), Де Кейпер (Минте, 46), Гомес (Марч, 59), Уэлбек (Костулас, 59)
«Манчестер Юнайтед»: Ламменс, Магуайр, Мартинес, Шоу (Маласиа, 82), Мазравий (Йоро, 74), Маунт (Флетчер, 74), Майну, Бруну Фернандеш, Доргу (Лэйси, 62), Диалло, Мбемо (Зиркзе, 74)
Огоҳлантиришлар: Майну, 45

«МЮ» аллақачон учинчи ўринни кафолатлаганди ва «Брайтон»га қарши ўйин олдидан жамоа учун битта интрига бор эди – жамоа сардори Бруну Фернандеш АПЛ тарихидаги энг яхши ассистентга айланадими? Ва бу мақсадга эришилди: португалиялик яримҳимоячи биринчи бўлимдаёқ Доргунинг голига узатма берди ва бу мавсумдаги голли узатмалари сонини 21 тага етказиб, АПЛ рекордчисига айланди. У иккинчи бўлимда ўз номига ҳам гол ёздириб қўйиб, Англия чемпионатидаги голли ҳаракатлар сони (143) бўйича Дэвид Бекҳэмни ортда қолдирди. Шу ритмда давом этадиган бўлса, Бруну кейинги мавсумда Пол Скоулзни (162) ортда қолдириб, учинчи ўринга кўтарилиши ҳам мумкин. Аммо унга Уэйн Руни (276) ва Райан Гиггзга (271) яқинлашиб олиш учун ҳам кўп йиллар керак бўлади.

«Брайтон» эса бу мағлубиятдан кейин турнир жадвалида «Сандерленд»ни олдинга ўтказиб юборди ва кейинги мавсумда Европа Лигасида эмас, Конференциялар лигасида қатнашадиган бўлди.

«Челси» 10-ўринда

«Сандерленд» – «Челси» 2:1
Голлар: Ҳюм, 25 (1:0). Гюсто, 50 – автогол (2:0). Палмер, 56 (2:1)
«Сандерленд»: Руфс, О`Найен, Мукиеле, Мандава, Гертрейда, Садики, Жака, Ле Фе (Ригг, 90), Ангуло (Диарра, 61), Ҳюм, Бробби (Изидор, 61)
«Челси»: Санчес, Колвилл, Хато (Жеймс, 53), Фофана, Фернандес, Кайседо (Ачимпонг, 85), Кукуреля, Гюсто (Делап, 85), Палмер, Педру Нету (Чалоба, 65), Жоао Педро
Огоҳлантиришлар: Ангуло, 42. Гертрейда, 52. Жака, 73. Диарра, 81. Садики, 89 – Фофана, 54. Фернандес, 69. Жоао Педро, 90. Палмер, 90
Четлатиш: Фофана, 62 (иккинчи сариқ)

Шу куни еврокубоклар йўлланмасини қўлга киритган яна бир бахтиёр жамоа – чемпионшипдан чиққан «Сандерленд» бўлди. «Қора мушуклар» ўзаро баҳсда «Челси»ни мағлуб этган ҳолда, ўз тарихидаги энг яхши натижани қайд этди ва еттинчи ўрин билан Европа лигасида қатнашадиган бўлди.

Ўтган мавсумда Конференциялар лигасида ва клублар ўртасидаги жаҳон чемпионатида ғолиб бўлган лондонликлар эса бу мавсумни АПЛда 10-ўрин билан якунлаб, кейинги мавсумда ҳеч қайси еврокубокда қатнашмайдиган бўлди. Бу бир томондан ёзда жамоани қабул қилиб оладиган Ҳаби Алонсо учун айни муддао. У«Стэмфорд Бриж»да ўз ўйинини қуриш учун идеал шароитга эга бўлади.

«Тоттенҳэм» АПЛда қолди

«Тоттенҳэм Ҳотспур» – «Эвертон» 1:0
Гол: Палиня, 43 (1:0)
«Тоттенҳэм Ҳотспур»: Кински, Дансо, ван де Вен, Удоджи (Дрэгушин, 90), Порро, Палиня, Бентанкур (Мэддисон, 82), Галлаҳер (Грэй, 82), Тел (Сарр, 73), Спенс, Ришарлисон (Коло Муани, 73)
«Эвертон»: Пикфорд, Кин, Тарковски, Миколенко, О`Брайен (Армстронг, 62), Гарнер, Ироэгбунам (Коулман, 84), Ндиай, Дюсбери-Ҳолл (Алкарас, 84), Рел (Жорж, 62), Барри (Бету, 84)
Огоҳлантиришлар: Сарр, 80. Палиня, 87 – О`Брайен, 13. Тарковски, 89

«Вест Ҳэм» – «Лидс» 3:0
Голлар: Кастелянос, 67 (1:0). Боуэн, 79 (2:0). Уилсон, 90 (3:0)
«Вест Ҳэм»: Ҳермансен, Дисаси, Мавропанос, Диуф, Уокер-Питерс, Фернандеш, Соучек, Пабло (Уилсон, 46), Саммервилл, Боуэн, Кастелянос (Канте, 88)
«Лидс»: Дарлоу, Бийол (Жеймс, 70), Стрейк, Родон, Ампаду, Ааронсон (Борнау, 90), Танака (Буонанотте, 78), Жастин, Богл (Пиру, 78), Калверт-Люин (Нионто, 69), Нмеча
Огоҳлантиришлар: Бийол, 10. Ааронсон, 25. Ампаду, 88

Бир йил муқаддам ҳам чемпионатни муваффақиятсиз ўтказган «Тоттенҳэм» Европа Лигасида ғолиб чиққан ва ЕЧЛга йўлланма олганди. Бу сафар сўнгги турда Жоау Палинянинг ягона голи «шпорлар» жонига ора кирди. Роберто Де Дзерби қаторасига иккинчи мавсумда турнир жадвалида 17-ўринни эгаллади ва лигада жон сақлаб қолди. «Вест Ҳэм» эса сўнгги турда «Лидс» устидан йирик ҳисобда ғалаба қозонганига қарамай, «Бёрнли» ва «Вулверҳэмптон» билан бирга чемпионшипга тушиб кетди. «Болғачилар» 39 очко жамғаришди, бу эса сўнгги 15 йилликда 18-ўрин эгалари учун максимал кўрсаткичдир. Охирги бор бу қадар кўп очко жамғариб ҳам лигани тарк этган жамоалар «Бирмингҳэм» ва «Блэкпул» бўлганди.

Якуний турнир жадвали