Чилилик депутат парламент йиғилишида 15 соат нутқ сўзлади

Депутатлар орада икки марта 15 ва 20 дақиқалик танаффусга чиқиб келишган. Наранхонинг чиқиши давомида шифокор уни икки марта текширган.

Фото: AFP

Чилилик депутат Хаиме Наранхо мамлакат президенти Себастян Пиньера импичменти бўйича ўтказилган парламент йиғилишида ҳамкасби овоз беришга етиб келиши учун қарийб 15 соат нутқ сўзлади.

Мухолиф социалистик партия вакили бўлган Наранхо нутқини душанба куни соат 10:24да бошлади ва сешанба тунги соат 01:24да якунлади.

BioBio радиостанциясининг маълумот беришича, депутатлар орада икки марта 15 ва 20 дақиқалик танаффусга чиқиб келишган. Наранхонинг чиқиши давомида шифокор уни икки марта текширган.

У йиғилиш олдидан BioBio радиостанциясига камида 13 соат ўқишга мўлжалланган 1300 саҳифалик нутқ тайёрлаганини айтган. Наранхо шу йўл билан йиғилишни сешанбагача чўзишга, 9 ноябргача карантинда ўтириши лозим бўлган депутат Жоржо Жексоннинг президент Пиньеранинг импичменти бўйича овоз беришга етиб келиши учун имконият яратмоқчи бўлган.

Жексон ярим тундан сўнг Instagram саҳифасида парламент томон йўлга чиққани акс этган видеони жойлаштирган.

Қонунчилик гуруҳи "Пандора ҳужжатлари"га асосланиб Пиньерани коррупцияда гумон қилган ва парламентга импичмент масаласини киритганди. Ушбу ташаббусни 155 депутатдан камида 78 нафари қўллаб-қувватлаши лозим. Жексоннинг овоз бериши шу маънода муҳим аҳамият касб этган.