Янгиариқда кўп қаватли уй хонадонида қамалиб қолган бола қутқарилди

Хоразм вилояти, Янгиариқ туманидаги уйларнинг бирида эҳтиётсизлик туфайли қамалиб қолган болага Фавқулодда вазиятлар бошқармаси (ФВБ) ходимлари томонидан ёрдам берилди.

8 ноябрь куни Мустақиллик кўчасида жойлашган кўп қаватли уйларнинг 2-қаватидаги хонадонда яшовчи 3 ёшли бола онаси уйдан чиқиши билан эшикни қулфлайди. Сўнгра уни мустақил равишда очолмайди ва ичкарида қамалиб қолади.

Вазият юзасидан Янгиариқ туман фавқулодда вазиятлар бўлими ходимлари ёрдамга келиб, узун нарвон орқали 2-қаватдаги ойнадан хонадонга киришади. Қулфни очиб, болани соғ-саломат оиласига топширишади.