Болгарияда президент ва парламент сайловлари ўтмоқда

14 ноябрда Болгарияда президент ва парламент - Халқ йиғинига муддатдан олдин сайловлар бўлиб ўтмоқда. Шу муносабат билан соат 7дан бутун мамлакат бўйлаб 13 мингга яқин сайлов участкаси ўз ишини бошлаган ва соат 20 гача очиқ қолади. Эътиборлиси, президент лавозимига 23 номзод даъвогарлик қилмоқда.

Мамлакатда 6,7 млн киши овоз бериш ҳуқуқига эга. Бироқ экспертларнинг фикрича, сайловларда аҳолининг 50 фоиздан камроғи иштирок этади.

Парламент сайловларида 20 та партия ва 7 та коалиция иштирок этмоқда, 240 депутатлик ўрнига 5 мингдан кўпроқ номзод даъвогарлик қилмоқда. Аҳоли орасида “Болгариянинг европача ривожланиши учун фуқаролар” партияси ва Демократик кучлари иттифоқи коалицияси катта қўллаб-қувватловга эга. 

Пандемия шароитида ўтаётган сайловлар тақдири кўп жиҳатдан овоз берувчиларнинг иштирокига боғлиқ бўлади. Агар овоз беришда сайловчиларнинг 50 фоиздан кўпроғи иштирок этса, унда иккинчи муддатга даъвогарлик қилаётган амалдаги президент Румен Радев 1-босқичдаёқ ғалаба қозониши мумкин. Бироқ 21 ноябрда сайловларнинг 2-босқичи ўтиши эҳтимоли юқорироқ деб баҳоланмоқда.

Сайловлар боришини 4 мингга яқин кузатувчи назорат қилади. Дастлабки натижалар сайлов участкалари ёпилиши биланоқ пайдо бўлиши кутилмоқда.