Байден ва Путин йил охиригача яна учрашиши кутилмоқда

АҚШ президенти Жо Байден ҳамда Россия президенти Владимир Путин йил якунига қадар яна бир марта учрашиши мумкин. Бу ҳақда Путиннинг матбуот котиби Дмитрий Песков маълум қилди.

Олдинроқ Россия Хавфсизлик кенгаши бош котиби Николай Путрушев ҳамда АҚШ президентининг хавфсизлик бўйича маслаҳатчиси Жейкоб Саливан телефон орқали суҳбатлашган ва улар «олий даражадаги учрашувни» ҳам муҳокама қилганди.

Дмитрий Песков матбуот анжуманида учрашув йил якунига қадар ўтказилиши мумкинлигини истисно қилмади ва унда қайси мавзулар ҳақида сўз боришини анонс қилди.

«Табиийки Украина ҳақида гаплашишади. Биз НАТО аскарларининг чегарамиз яқинидаги фаоллашувини провакацион ҳаракат деб баҳолаймиз. Бу борадаги тортишувли мавзулар муҳокама қилинади», дейди Песков.

Путиннинг матбуот котибига кўра, учрашув йил якунида ҳам, ундан кейинроқ ҳам ўтказилиши мумкин. Москва учун видеоконференция кўринишидаги суҳбат қулайроқ, аммо Путин ва Байден қандай кўринишда гаплашишни ўзаро ҳал қилади.

Россия президенти 18 ноябр куни мамлакат ташқи ишлар вазирлигида ўтказилган йиғилишда Женевада ўтган Байден билан учрашувдан кейин икки томонлама дипломатик муносабатлар ўнгланишига умид уйғонганини айтганди. Путин ва Байден илк марта жорий йил июн ойида Швейцариянинг Женева шаҳрида ўтган саммитда учрашганди.