Қўшимча функционаллар
-
Тунги кўриниш
Шавкат Мирзиёев Бельгияга ташриф буюради
Ўзбекистон ва Европа иттифоқи ўртасида кенгайтирилган шериклик ва ҳамкорлик тўғрисидаги битим лойиҳаси яқин вақт ичида якунланади. Бу ҳақда Ўзбекистон ташқи ишлар вазири Абдулазиз Комилов «Ўзбекистон – Европа иттифоқи» ҳамкорлик кенгаши йиғилиши якунлари бўйича маълум қилди.
Ташқи ишлар вазирининг қайд этишича, ушбу ҳужжатни имзолаш Ўзбекистон президентининг 2022 йилда Брюсселга бўлажак ташрифи доирасида режалаштирилган.
«Инсоний ўлчов, демократик ислоҳотлар, инсон ҳуқуқлари, диний эркинликлар, болалар меҳнати ва мажбурий меҳнатга йўл қўймаслик масалалари бўйича ҳамкорликка катта эътибор қаратилмоқда.
Айтишим мумкинки, биз кенгайтирилган шериклик ва ҳамкорлик тўғрисидаги битимни тайёрлашда ютуқларга эришдик. Келгуси йил президентимизнинг Брюсселга бўлажак ташрифи чоғида ҳужжатни имзолашни режалаштирган ҳолда, битим лойиҳасини яқин вақт ичида якунлаймиз», деди Абдулазиз Комилов.
ТИВ раҳбари, шунингдек, сиёсий кун тартибида Европа иттифоқи билан ҳамкорликни давом эттириш учун келажакда муҳокама қилиниши керак бўлган кўплаб масалалар мавжудлигини ҳам таъкидлади.
