Афғонистонда аёллар иштирокидаги сериаллар намойиши тақиқланди

«Толибон» ҳаракати Афғонистондаги телеканаллар учун янги қоидаларни жорий этди. Мамлакатда аёллар иштирокидаги сериаллар, шариат қоидаларига зид кино ва кўрсатувлар ҳамда аёллар ва эркаклар ярим яланғоч ҳолда бўлган клипларни намойиш этиш тақиқланди. 

Янги қоидаларга кўра, барча телеканаллар кўрсатувлари шариат ва ахлоқ меъёрларини бузмаслигини, кўнгилочар ва ҳажвий дастурлар диний эътиқодни таҳқирламаслигини назорат қилиши лозим.

Журналист ва бошловчи аёллар кадрда рўмол ўраган ҳолда кўриниши даркор, деб ёзади Би-би-си.

Толиблар шунингдек, ғарбий қадриятларни тарғиб қиладиган ва Муҳаммад алайҳиссалом ва унинг саҳобалари тасвирланган фильм ва сериаллар намойишларини ҳам тақиқлади.