Кеча, 1 декабрь куни соат 22:18ларда Тошкент шаҳар, Шайхонтоҳур тумани Жарариқ кўчасида жойлашган хонадонлардан бирида ёнғин келиб чиққан.
Фото: Ижтимоий тармоқлар
Фавқулодда вазиятлар вазирлиги хабарига кўра, 4 та ёнғин қутқарув техникалари воқеа жойига соат 22:26да етиб борган ва соат 22:55да ёнғин тўлиқ ўчирилган.
Ёнғин натижасида хонадоннинг тахминан 200-250 квадрат метр майдони зарарланган. Бирламчи маълумотларга кўра, жабрланган ва ҳалок бўлган фуқаролар йўқ.
Ҳозирда ёнғиннинг келиб чиқиш сабаблари ва келтирилган моддий зарар миқдори аниқланмоқда.
