“Формула-1” пойгаларида Red Bull жамоаси учун иштирок этувчи нидерландиялик пойгачи Макс Ферстаппен фаолиятида биринчи марта пойгалар ғолиби бўлди. Ферстаппен жорий мавсумнинг охирги босқичи — Абу-Даби гран-присида амалдаги чемпион Льюис Ҳэмилтонни ортда қолдириб, чемпион унвонини қўлга киритди.
Пойгалар тарихида 47 йил ичида илк бор чемпионликка даъвогар икки пойгачи – Ҳэмилтон ва Ферстаппен финал босқичига бир хил очко (369,5 дан) билан келди. Бундай ҳолат пойгалар тарихида бунгача фақат бир марта – 1974 йилда юз берган.
Амалдаги чемпион, Mercedes аъзоси Ҳэмилтон пойганинг аксарият қисмида етакчилик қилди, бироқ охирги айланада болиди покришкасини алмаштиришга улгурган Ферстаппен уни доғда қолдира олди. Натижада британиялик 2-ўрин билан кифояланиб қолди ва саккизинчи чемпионликни расмийлаштириш имконидан маҳрум бўлди.
Умумий жадвалда Ферстаппен 395,5 очко, Хэмилтон 387,5 очко тўплади. 3-ўринни Mercedes’нинг яна бир аъзоси Валттери Боттас (230 очко) эгаллади.
Эътиборлиси, 2014 йилдан бери биринчи марта чемпионликни Mercedes аъзоси бўлмаган пойгачи қўлга кирита олди.
Конструкторлар кубогида қаторасига саккизинчи йил Mercedes 1-ўринни эгаллади.
