Эрдўған Россия ва Украина президентларини Туркияга таклиф қилди

Фото: AP

Туркия президенти Ражаб Тоййиб Эрдўған Россия президенти Владимир Путин ҳамда Украина президенти Владимир Зеленскийни Туркияда ўзаро гаплашиб олишга таклиф қилган. Бу ҳақда Туркия президенти матбуот котиби Иброҳим Калинга асосланиб «Анадўлу» ёзмоқда.

Туркия президенти матбуот котиби «Россия ҳамда Украина ўртасидаги ҳарбий тўқнашувнинг Европа ва НАТОга таъсири» мавзусида ўтган онлайн мулоқот давомида бу мавзуга тўхталган. Унинг айтишича, Эрдўған бу борада Путин ва Зеленский билан мулоқот ўтказган.

«Туркия президенти Россия ва Украина етакчиларини кескинликни юмшатиш учун Туркияга таклиф қилди. Анқара Россия ва Украинага дўст давлат сифатида улар орасида ҳарбий тўқнашувлар бўлмаслиги учун ҳар қандай ҳаракатга тайёр», деб Иброҳим Калиннинг сўзларини келтирган «Анадўлу».

Россия ва Украина ўртасидаги ҳарбий тўқнашувлар яхши оқибатларга олиб келмаслигини таъкидлаган Туркия президенти матбуот котиби Эрдўған яқин ҳафталарда Украинага боришини ҳам маълум қилди.

Олдинроқ Эрдўған Россиянинг Украинага бостириб кириш эҳтимоли паст эканини айтганди.

#Туркия #Украина #Владимир Путин #Россия #Володимир Зеленский #Ражаб Тоййиб Эрдўған