«Оҳангаронцемент» Алишер Усмоновга алоқадор компания ихтиёрига ўтди

«Оҳангаронцемент» АЖнинг 98,6 фоиз улуши «Akkermann Cement CА» компанияси ихтиёрига ўтди. Бу ҳақда «Тошкент» республика фонд биржаси маълумотларида келтириб ўтилган.

«Akkermann Cement CА» МЧЖ Россиянинг «Akkermann Cement» компаниясига тегишли. Мазкур компанияга USM Cement, унга эса USM Holding эгалик қилади. Бу ҳолдингнинг асосчиси ва асосий акциядори – миллиардер Алишер Усмоновдир. 

20 январь куни тузилган битим бўйича «Оҳангаронцемент» АЖнинг 4,83 миллион дона оддий ва 2133 дона имтиёзли акциялари «Akkermann Cement CА» томонидан харид қилинган. Битим «Газпромбанк» томонидан молиялаштирилган.

2021 йилда «Akkermann Cement CА» 4 миллион тоннага яқин цемент ишлаб чиқарган. Компаниянинг асосий активлари Новотроицк ва Горнозаводскдаги цемент заводлари ҳисобланади.

13 январь куни «Оҳангаронцемент»нинг асосий акциядорлари ҳисобланадиган Lamanka Enterprises Limited ва Giacinttar Limited компаниялари ўз акциялари сотилишини маълум қилиб, жами 4 млн 837 минг 843 дона оддий акциянинг (98.36 фоиз) ҳар бирини 390 минг сўмдан баҳолаганди(умумий 1 трлн 886 млрд 758 млн сўм/173,8 млн АҚШ доллари).

Аввалроқ, Усмоновга қарашли бўлган“Телекоминвест” МЧЖ ва “Корус” АЖнинг «Капиталбанк»даги улуши ошганлиги маълум қилинганди.