UzAirways'нинг Туркиядаги ҳаракатлари эътирозларга сабаб бўлди

Парвозларнинг кетма-кет қолдирилиши

24 январ куни Истанбул вақти билан соат 21:40га белгиланган Истанбул–Тошкент рейсида учиши керак бўлган ўзбекистонлик йўловчининг Kun.uz'га сўзлаб беришича, кучли қор ёғгани ва парвозлар бекор қилинган сабабли кўплаб ўзбекистонликлар аэропортда қолиб кетган.

“2 кундан бери аэропортда қоляпмиз. Бошида авиакомпания томонидан на еб-ичиш на бошқа нарсамиздан хабар олинди. Компания вакилига учрасак, фақат чипта санасини ўзгартириб бера олишини, бошқа ҳеч нарса қилолмаслигини маълум қилди. Кўпчилик бўлиб талаб қилганимиздан кейин овқат ва ичимлик билан таъминлашди.

Ҳаво ёмонлиги учун самолётимиз Истанбулга эмас, Анқарага қўнган экан. Ҳали биздан олдинги рейсдагилар ҳам учмаган. Шунга бизнинг рейсни 26 январ кечқурун жўнайди дейишяпти”, – дейди йўловчи.

Kun.uz'га тақдим этилган видеоёзувда йўловчилар ва авиакомпания вакили ўртасида баҳс боради.

{Yii::t(}

Ўтказиб юбориш 6s

Ўтказиб юбориш

Юқорида йўловчи айтганидек, 24 январь куни Тошкентдан Истанбулга парвоз қилган Uzbekistan Airways самолёти мураккаб об-ҳаво туфайли Анқарага қўнишга мажбур бўлган.

Ушбу рейс йўловчиларидан бирининг Kun.uz'га маълум қилишича, йўловчилар дастлаб меҳмонхонага жойлаштирилган, кейинроқ уларга Истанбулга қадар автобусда бориш таклиф қилинган.

Йўловчиларнинг аксарияти қорли ва довонли йўллар орқали 700 кмга яқин масофага йўлга чиқиб Истанбул сари йўл олган. Ҳолбуки бу пайтда ички рейслар тикланган ва Анқара–Истанбул йўналишида самолётлар уча бошлаган бўлган.

Kun.uz билан боғланган ўзбекистонлик фуқаро қорли ҳавода автобусда кетиш хатарли экани боис ички рейсдаги самолётга ўзининг ҳисобидан чипта сотиб олиб, Истамбулга учиб кетган. Бошқа йўловчилар автобусда кетишга мажбур бўлган.

Анқара аэропортидаги таблодан (Kun.uz манбаси юборган сурат) 26 январ куни Истамбулга 4 та рейс мавжудлигини кўриш мумкин.

Uzbekistan Airways изоҳи

“Uzbekistan Airways”АЖ матбуот хизмати вакили Камола Икромованинг Kun.uz'га маълум қилишича, 24 январ кунидан бошлаб ноқулай об-ҳаво сабабли Истанбул халқаро аэропортида форс-мажор ҳолати юзага келган.

“Албатта, бўлиб ўтган воқеалар йўловчиларнинг норозиликларига сабаб бўляпти. Аммо шуни ҳисобга олиш керакки, ҳозирги ҳодиса фақатгина бизнинг компаниямизга боғлиқ эмас, Истанбул аэропортида самолётни қўндириш ва учира олиш салоҳиятини ҳам тўғри тушунишимиз керак. Шу қорда ҳам аэропортдан самолётни учириб юбориш имконияти қисман бўлиши мумкин, бироқ бу йўловчилар ҳаётини катта хавф остида қолдириши туфайли аэропорт фаолияти тўхтатиб турилибди.

24 январ куни 272 ва 276 транзит рейслар орқали учиб бориб, Туркияда қолиб кетган ҳамюртларимизга меҳмонхоналар ташкил этдик. Уларни иссиқ овқат билан таъминладик. Шунингдек, Истанбул аэропорти расман ёпилгани учун 25 ва 26 январ кунларига режалаштирилган рейслар ҳам бекор қилиниб, бу йўловчиларга аввалдан эълон қилинди. Шу муносабат билан биз ҳозирда йўловчиларга чипта санасини аэропорт фаолияти тикланганидан кейинги бошқа вақтга кўчиришни таклиф қиляпмиз. Шунингдек, йўловчилар чипта пулини тўлиқ қайтариб олиш ҳуқуқига ҳам эга”.

Компания вакили Анқарага қўнган йўловчилар хусусида ҳам муносабат билдирди.

“Анқарада 200га яқин йўловчи бор эди ва уларнинг барчаси меҳмонхонадан жой ва иссиқ овқат билан таъминланди.

Ҳозирда рейслар тикланишини кутиб турибмиз. Шунинг учун Анқарада бўлиб турган барча йўловчиларга Истанбулгача автобус ташкил этилади”.

Парвозлар кечиктирилганда йўловчиларнинг қандай ҳуқуқлари бор?

Ҳаво транспортида йўловчи ва багаж ташиш қоидаларига кўра, парвоз ташувчи томонидан белгиланган аниқ вақтдан кечикса, ташувчи йўловчига етказилган зарарни қоплаши шарт.

Шунингдек, йўловчига етказилган зарар учун ташувчи томонидан қуйидаги бепул қўшимча хизматлар кўрсатилади:

• бир маротаба телефон орқали гаплашиш ёки телеграмма юбориш ёки бошқа алоқа хизматларидан фойдаланишни таъминлаш;
• парвозгача кутиш даврида ёки транспортнинг бошқа тури орқали ташишгача бўлган вақтда озиқ-овқат ва ичимлик суви билан таъминлаш;
• ташувчи қоидаларида белгиланган муддат кутиш вақтидан кўра кўпроқ бўлса, меҳмонхона билан таъминлаш;
• кутиш вақтида транспорт орқали аэропортдан вақтинчалик яшаш жойигача элтиб қўйиш ва қайтишни таъминлаш;
• чиптада назарда тутилган туташ рейсларга кечикиш билан боғлиқ харажатларни тўлаш.