Солиқ қўмитаси кешбэк тўлашни 21 февралдан кейин бошлайди

Давлат солиқ қўмитаси 1 фоизлик кешбек қачон қайтарилиши масаласига аниқлик киритди.

Фото: Давлат солиқ қўмитаси

2022 йил 1 январдан QR-кодли харид чекларини «Солиқ» мобил иловасида рўйхатдан ўтказган жисмоний шахслар харид суммасидан 1 фоизлик кешбэкка эга бўлмоқда.

Сотиб олинган товарлар қайтарилганда тадбиркорлик субъектларида харид чекларига тузатиш киритиш имконияти мавжудлиги ва улар томонидан солиқ ҳисоботларини тақдим этиш муддатлари ҳисобот ойидан кейинги ойнинг 20-санасигача этиб белгиланганини инобатга олган ҳолда, кешбэк суммаси 21-25-саналарда қайтарилиши маълум қилинди.

«Яъни, январь учун февраль ойининг 21-25-саналарида, февраль учун эса март ойининг 21-25-саналарида кешбэк қайтарилади», дейилади хабарда.

Билдирилишича, агар чек бермаслик ҳолатлари юз берса «Солиқ» мобил иловасининг «Солиқ ҳамкор» бўлими орқали хабар бериш мумкин. Мурожаатчига ҳуқуқбузарлардан ундирилган жарима суммасининг 20 фоизи мукофот сифатида тўлаб берилади.

Маълумот учун, тўлов терминали орқали қабул қилинган тўловлар учун харидорларга тўлов терминали чеки билан бирга онлайн-НКМ ёки виртуал касса чеки ҳам берилиши шарт.

Аввалроқ, ДСҚ 16 мингга яқин чеклар учун кешбэкни техник ходимлар рўйхатдан ўтказгани боис бекор қилганди.

#солиқ #кешбэк