Россия Украинада илк марта «Кинжал» аэробаллистик ракетасини ишлатди

Россия армияси Укаринада давом этаётган ҳарбий ҳаракатларда илк марта «Кинжал» аэробаллистик ракетасидан фойдаланди. Бу ҳақда мамлакат Мудофаа вазирлиги маълум қилди.

Фото: Россия Мудофаа вазирлиги

«Ҳарбий операция давомида Россия Ҳаво кучлари томонидан илк марта «Кинжал» гипертовушли аэробаллистик ракетаси қўлланилди. Унинг ёрдамида Ивано-Франковск вилоятидаги ерости ўқдори омбори йўқ қилинди», дейилди Россия Мудофаа вазирлиги 19 март тонгида ўтказган брифингда.

«Кинжал» қирувчи самолётдан туриб ташланадиган аэробаллистик ракета ҳисобланади. Уни «Искандер» ракета комплексининг самолётдан ташланадиган ихчам кўриниши ҳам дейишади. Бу ракетани тўхтата оладиган ҳаво ҳужумидан ҳимоя воситаси борлиги маълум эмас. «Кинжал» белгиланган объектлар, ҳарбий кемалар ва авиаташувчиларни йўқ қилишга мўлжалланган.

«МиГ-31К» самолёти «Кинжал» ракетасининг 1 тасини, «Ту-22М3М» самолёти 4 тасини, ТУ-160 самолёти 8 тасини олиб уча олади.

2017 йил рўйхатга олинган «Кинжал» аэробаллистик ракетаси ҳозиргача фақат синов машғулотларида ишлатилган. Хусусан, Арктика ва Сурияда ҳам синовдан ўтказилган. Охирги синов Россия ҳарбий операцияни бошлашидан 5 кун аввал – 19 феврал куни Путиннинг гувоҳлигида ўтказилганди.

Дунёда гипертовушли ракетага эгалиги ҳақида фақат Россия расман эълон қилган. АҚШ 2022 йил бундай турдаги ракетани ишлаб чиқаришни мудофаа комплексининг асосий вазифаларидан бири деб белгилаган. Хитой ҳам товушдан тез учувчи бундай ракеталарнинг муваффақиятли синовини ўтказгани айтилади, аммо бу маълумотлар расман тасдиқланмаган.