Байден ортидан Трамп ҳам Украинада тинч аҳоли ўлдирилишини геноцид деб атади

АҚШнинг собиқ президенти Дональд Трамп Украинада тинч аҳоли вакиллари ўлдирилишини геноцид деб баҳолашини маълум қилди. У Fox News телеканалига берган интервьюсида шу ҳақдаги саволга жавоб берган.

Телеканал бошловчиси аввалига Трампга мамлакатдаги инфляция борасидаги фикрларини билдиришни сўраган. Бунга жавобан собиқ президент АҚШнинг амалдаги президенти Жо Байденнинг сиёсати шундай юқори инфляцияга олиб келганини айтган. Трампнинг фикрича, ўзининг президентлиги даврида АҚШ «дунё тарихидаги энг йирик иқтисодиётга айланган», аммо бу лавозимни Байден эгаллагач «барчаси барбод бўлган».

«Булар бари - инфляциядан тортиб энергетик қарамликдаги йўқотишлар ўзингга ўзинг жароҳат етказишдир. Бунга қараш қайғули, энди эса бунга Украинадаги воқеалар қўшилди. Украинада содир бўлаётган воқеалар — бу геноциддир. Одамзод аввал ҳеч қачон бунақасига гувоҳ бўлмаган», — деган Трамп.

Шу кунларда Америка президенти Жо Байден ҳам Украинада тинч аҳоли қирғин қилинишини геноцид деб баҳолаганди. Кейинроқ Оқ уй расмийси Жен Псаки Байденнинг сўзлари шахсий фикр эканини айтган ва бу баёнот тинч музокараларга зарар келтирмаслиги кераклигини таъкидлаган.

Кремлдагилар Байденнинг сўзларини «қабул қилиб бўлмас» деб атаган.

Французлар етакчиси Эммануэл Макрон эса Украинадаги воқеаларни геноцид деб аташга шошилмаган. «Мен бу терминни ишлатишда эҳтиёткор бўлган бўлардим. Украин ва рус халқлари — биродар халқлар», — деган у. Макрон тинчлик бўйича музокаралар имконияти йўққа чиқишини истамаслиги, бундай риторика билан тинчликка эришиб бўлмаслигини айтганди.