Россияда Владимир Соловьёвга суиқасд тайёрлангани айтилди

«Бугун тонгда ФСБ томонидан россиялик машҳур журналистлардан бирига қарши суиқасд уюштиришга уринган террорчилар гуруҳи қўлга олинди», деди Путин Россия бош прокуратурасида чиқиш қилар экан.

Кейинчалик Россия Федерал хавфсизлик хизмати (ФСБ) гап Владимир Соловьёв ҳақида кетаётганини маълум қилди.

«Россия тергов қўмитаси томонидан мамлакат ҳудудида фаолияти чекланган «National Socialism/White Power» гуруҳи аъзоси бўлмиш Россия фуқаролари қўлга олинган. Улар Украина Хавфсизлик хизмати топшириғи билан машҳур журналист Владимир Соловьёвни ўлдиришни мақсад қилган», дея ФСБ вакилининг сўзларини келтирган «Интерфакс».

Унинг сўзларига кўра, гуруҳ Соловьёвни ўлдиргач, чет элга қочишни мақсад қилган. Хабарда ёзилишича, қўлга олинганларнинг уйидан 8 та «Молотов коктейли», қўлбола  портловчи қурилмалар, 6 та Макаров тўппончаси, қирқма милтиқлар, 5 та граната ва мингдан ошиқ патронлар топилган.

58 ёшли Соловьёв Россия ҳукумати позициясини тарғиб қилувчи асосий пропагандачи журналист ҳисобланади. У Россия федерал каналларида кўрсатувлар тайёрлайди, Владимир Путин билан бир неча марта интервью уюштирган. Россия Украинага бостириб киргач, кўплаб сиёсатчилар қаторида Соловьёв Ғарбнинг персонал санкцияларига учраб, унинг YouTube'даги канали ёпилганди.