Россия етти нафар даниялик дипломатни мамлакатдан чиқариб юборади

Россия ташқи ишлар вазирлиги Дания элчихонасининг етти нафар ходимини персона нон грата деб эълон қилди.

Таъкидланишича, бунга россиялик дипломатларнинг Даниядан чиқариб юборилиши ва «Дания ҳукуматининг Киевга ҳарбий ёрдам бериши» сабаб бўлган.

Россия ТИВ шунингдек, «Копенҳагеннинг нодўстона ҳаракатлари»га нисбатан кескинроқ чоралар кўрилиши мумкинлиги ҳақида огоҳлантирди.

«Қиролликнинг Россияга қарши ошкора сиёсати икки томонлама муносабатларга жиддий зарар етказиши мумкин»,— дейилади ТИВ хабарида.

5 апрел куни Россиянинг Даниядаги элчихонаси ва савдо ваколатхонасининг 15 нафар ходими Даниядан чиқариб юборилганди. Улар жосусликда айбланган.