Қўшимча функционаллар
-
Тунги кўриниш
НАТО Туркиянинг Швеция ва Финландия бўйича позицияси ўзгаришини маълум қилди
НАТОга аъзо кўплаб давлатлар Швеция ва Финландиянинг альянсга қўшилишини тезлаштирилган тартибда ратификация қилишга ваъда бермоқда. Блок бош котиби Йенс Столтенберг Туркиянинг эътирозлари олиб ташланишига ишонч билдирди.
Фото: Getty Images
НАТО бош котиби Йенс Столтенберг Шимолий Атлантика альянси давлатлари Туркиянинг Швеция ва Финландия аъзолигига доир эътирозларини бартараф эта олишига ишонч билдирди. Бу ҳақда у 15 май, якшанба куни Берлинда бўлиб ўтган НАТО ташқи ишлар вазирлари норасмий учрашуви якунида маълум қилди, деб хабар берди DW.
Қайд этилишича, расмий Анқара «нияти аъзоликка тўсқинлик қилиш эмаслигини аниқ тушунтирди», дея таъкидлаб ўтган Столтенберг.
Туркия томони Стокҳолм ва Ҳелсинкининг Туркияда тақиқланган деб тан олинган курд ташкилотларига муносабатини номақбул деб ҳисоблайди. НАТОга янги давлатларнинг кириши эса фақат барча амалдаги аъзо мамлакатларнинг бир овоздан розилиги билан амалга оширилади.
НАТО бош котиби Финландия ва Швециянинг Россиянинг эҳтимолий ҳаракатлари туфайли альянсга кириш тўғрисида ариза беришдан якуний ратификация қилишгача бўлган давр бўйича хавотирини тушунишини билдирди. «Биз бу жараённи имкон қадар тезлаштиришга ҳаракат қиламиз. НАТОга аъзо кўплаб давлатлар тезлаштирилган тартиб ишга туширилишини билдирди», - деди Столтенберг.
НАТО бош котиби ўтиш даврида альянснинг Швеция ва Финландияга амалий ёрдам кўрсатиши ҳақидаги саволга эҳтиёткорлик билан жавоб берди. «Биз хавфсизлик кафолатларини таъминлаш йўлларини кўриб чиқамиз, жумладан, НАТОнинг Болтиқбўйи минтақасида, Финландия, Швеция ва унинг атрофидаги иштирокини ошириш назарда тутилади», - деди Столтенберг.
Айни пайтда, Германия ташқи ишлар вазири Анналена Бербокнинг айтишича, агар Швеция ва Финландия аъзолик учун ариза топширса, иттифоқ мамлакатлари уларни тезлаштирилган тартиб асосида кўриб чиқади. Бербок Германия Скандинавиядаги икки давлатни қабул қилиш тўғрисидаги қарорни ратификация қилган дастлабки давлатлардан бири бўлишини ваъда қилди. «Швеция ва Финландия, агар сиз тайёр бўлсангиз, биз ҳам тайёрмиз», деди Германия ташқи ишлар вазири.
«Россиянинг босқинчилик уруши Россия президенти доим четлаб ўтишни хоҳлаган нарсага олиб келди», деди Бербок. Унинг сўзларига кўра, альянснинг роли НАТО мамлакатларида янада яхши тушунилмоқда. Бундан ташқари, энди НАТОга «буни 24 февралгача режалаштирмаган икки давлат катта эҳтимол билан қўшилади», дея қўшимча қилди Германия ташқи сиёсат идораси раҳбари.
Бундан олдин Туркия Швеция ва Финландиянинг НАТОга киришига эътироз билдирганди.
