НАТОнинг иккита штаби Финландияда жойлаштирилади

Финландияда НАТОнинг иккита штаби— Шимолий алянс қуруқликдаги кучларининг Шимолий Европадаги штаби ва илғор қуруқликдаги кучлар (FLF) штаби жойлаштирилади. Уларнинг аниқ жойлашуви ҳақидаги қарор яқин орада қабул қилинади, деб хабар берди Финландиянинг Yle телеканали 18 сентябр куни.

Хелсинкидан 230 км шимоли-шарқда, Россия Федерацияси билан чегара яқинида жойлашган Миккели Шимолий Европадаги НАТО қуруқликдаги кучларининг штаби жойлашадиган жой сифатида кўриб чиқилмоқда. Илғор қуруқликдаги қўшинлар штаби мамлакат шимолидаги Соданкюля ёки Рованиемида жойлаштирилиши мумкин, дея хабар беради Yle.

Швеция Финландияда жойлаштириладиган НАТОнинг илғор қуруқликдаги қўшинларига қўмондонликни ўз зиммасига олишга тайёр, дея эълон қилди икки давлат мудофаа вазирлари 16 сентябр куни Стокҳолмда. Ўз навбатида, Финландия президенти Александр Стубб Yle нашрига таъкидлаганидек, НАТО штабларини жойлаштириш бўйича қарорлар ҳали қабул қилинмаган ва алянс минтақавий сиёсат масалаларидан эмас, балки ҳарбий манфаатлардан келиб чиқади.

Финландияда НАТО бригадаси жойлаштирилади

Август ойи охирида Финландия ташқи таҳдидларнинг олдини олиш учун ўз ҳудудида НАТО зирҳли бригадасини жойлаштириши мумкинлиги хабар қилинган эди. 4000-5000 аскар ва офицердан иборат бригада аллақачон шакллантирилмоқда ва улар Миккелида жойлаштирилади, деб ёзади Iltalehti НАТО ва хавфсизлик хизматларидаги манбаларга таяниб.

Бундан ташқари, Скандинавия мамлакатлари томонидан яриморол шимоли орқали Норвегия портларидан Финландиягача бўлган ҳарбий транспорт коридори яратилиши маълум бўлди.

Россиянинг Украинага қарши кенг кўламли уруши фонида Финландия 2023 йилда НАТОга қўшилди ва шу билан 75 йиллик бетарафлик даврини тугатди. Натижада алянснинг Россия билан умумий чегараси икки баробарга ошиб, 2600 километрга етди.