Финландия Россия билан чегарага НАТО штабини жойлаштиради

Финландия Мудофаа вазирлиги НАТОнинг қуруқликдаги қўшинлари қўмондонлигини Россия билан чегарадан 140 километр узоқликдаги Миккели шаҳрига жойлаштиришга рухсат берди. Бу ҳақда ҳарбий идоранинг расмий сайтида сўз боради.

Мамлакат Мудофаа вазирлиги раҳбари Антти Хаккяненнинг таъкидлашича, Миккелида ҳозирда Финландия қуруқликдаги қўшинлари қўмондонлиги мавжуд ва уни Шимолий Атландия алянси базаси билан бирлаштириш орқали мамлакат «миллий мудофаа ҳамда НАТОнинг мудофаа имкониятларини ўзида жамлаган энг яхши ечимга» эга бўлади.

Одатдаги ҳолатда база НАТОнинг ўқувларига ва «ҳудуддаги бошқа тинчлик ҳаракатларига» жавоб беради. Инқироз вақтида эса штаб Шимолий Атлантика алянси қуруқликдаги қўшинлари операциялари раҳбарлиги остида фаолият юритади. Қўмондонлик таркибидан ҳам иттифоқ, ҳам фин мудофаа кучлари ўрин олади.

Штабни яратишга тайёргарлик ўтган йилнинг баҳоридан бери давом этмоқда. Хусусан, Миккелига НАТОнинг Норфолк штаби қўмондони ўринбосари, Британия контр-адмирали Тим Генри ташриф буюрганди. «Биз русларга тўғридан тўғри хабар юборишни истаймиз — ва буни омма олдида қилмоқчимиз. Иттифоқ ўз позициясида жуда аниқ: Россия евроатлантика минтақасига таҳдид солмоқда», — деган Генри бу ташрифи чоғида.

Россиянинг Украинага қарши кенг кўламли уруши фонида Финландия 2023 йилда НАТОга қўшилди ва шу билан 75 йиллик бетарафлик даврини тугатди. Натижада альянснинг Россия билан умумий чегараси икки баробарга ортиб, 2600 километрга етди.