Чимкентдаги дорихонада юз берган портлаш оқибатида уч киши ҳалок бўлди 

Чимкентдаги дорихонада содир бўлган портлаш оқибатида ҳалок бўлганлар сони уч нафарга етди, деб хабар берди Tengrinews.kz Қозоғистон соғлиқни сақлаш вазирлигига таяниб.

Соғлиқни сақлаш вазирлигининг билдиришича, вазият вазирлик назорати остида.

"Психологлар гуруҳи фаолияти ташкил этилди. Бундан ташқари, ҳомиладорлар ва чақалоқларни кўчириш ишлари олиб борилмоқда", - дейилади хабарда. 

Маълум қилинишича, 21 май куни Чимкентдаги туғруқхона ёнида жойлашган дорихонада портлаш содир бўлган. Дастлабки маълумотларга кўра, портлашга тўпланиб қолган газ чақнаши сабаб бўлган. 

Портлаш натижасида дорихона қоровули ва бир нафар чақалоқ ҳалок бўлган, шунингдек, дорихона ёнида жойлашган уйнинг балкони ва деразалари ҳамда еттита енгил автомобилга зарар етган.