Дутерте Украинадаги урушни қоралади

Филиппин президенти Родриго Дутерте ҳукумат аъзолари билан ҳафталик телеконференцияси вақтида Россиянинг Украинага босқини вақтида тинч аҳоли вакиллари ўлдирилгани учун Владимир Путинни танқид қилди. Дутертенинг сўзларига кўра, Путин «махсус ҳарбий амалиёт» деб атаётгани аслида — Россия суверен давлатга қарши олиб бораётган кенг миқёсли урушдир.

«Кўпчилик биз Путин иккимиз ҳам қотил эканимизни айтади. Мен аллақачон сизларга, филиппинликларга, мен чиндан ҳам одам ўлдиришимни айтганман. Аммо мен жиноятчиларни ўлдираман, болалар ва кексаларни эмас. Биз у билан турлича дунёларда яшаймиз», — дея Филиппин президенти сўзларини келтиради The Independent.

Дутерте Украинадаги уруш дунёда нефт нархи кўтарилишига олиб келгани ва бундан кўплаб давлатлар, жумладан Филиппин ҳам жабр кўрганини қўшимча қилган.

Дутертенинг президентлик муддати 30 июн куни якунига етади. Мамлакат конституциясига кўра, давлат раҳбари фақат бир марта олти йил муҳлатга сайланиши мумкин. Май ойида бўлиб ўтган президентлик сайловларида диктатор Фердинанд Маркоснинг ўғли бўлмиш Фердинанд Маркос ғалаба қозонди. Дутертенинг қизи Сара эса вице-президентликка сайланди.

Родриго Дутерте аввал бир неча бор Россия ҳукумати ва шахсан Путинни қўллаб-қувватлаганди. У РФ президенти билан уч учрашувидан бирида, 2016 йил ноябрида Россияни «буюк мамлакат» деб атаган, Ғарбни «иккиюзламачилик»да айблаганди.

Дутерте гиёҳванд моддалар савдосига қарши энг шафқатсиз методлар қўллаш тарафдори ҳисобланади. Amnesty International маълумотига кўра, унинг президентлигининг дастлабки олти ойида полиция ва номаълум қуролли шахслар етти мингдан ортиқ кишини ўлдиришган. Ҳуқуқ фаоллари маълумотига кўра, қурбонлар орасида болалар ҳам бўлган. Халқаро жиноий суд ушбу суддан ташқари қотилликларни шартли равишда инсониятга қарши жиноят сифатида баҳолаб, тергов бошлаган.

2021 йил ёзида эса Дутерте коронавирусга қарши вакцина қабул қилишдан бош тортувчиларни қамоққа тиқишни ваъда қилганди. Шу билан бирга, у вакцинага қарши бўлганлар қамоқда эмланишини айтганди. Ундан аввалроқ Родриго Дутерте полициячиларга мамлакатда қатъий локдаун эълон қилинган чоғда карантин қоидаларини бузганларни отишга рухсат берганди.