Украина 6 июнга ўтар кечаси ва эрталаб Санкт-Петербург шаҳри ва Ленинград области бўйлаб дронлар орқали ёпирилма ҳужум уюштирди. Бу ҳужум Петербургда халқаро иқтисодий форум ёпилиш кунига тўғри келди; тўрт кунлик форумда бу шаҳарга иккинчи бор дронлар ҳужуми амалга оширилиши бўлди.
Санкт-Петербург губернатори Александр Беглов эрталабки мурожаатида аҳолини кўчага чиқмасликка чақирган – бунақаси уруш бошидан буён илк бор кузатилмоқда. Бир неча соат ўтиб Беглов ҳужум қайтарилгани, уч киши яралангани ҳақида ҳисобот берди. Шу билан бирга, у ҳаво ҳужумидан мудофаа тизимлари «жиддий зарар етказилишига йўл қўймагани»ни қайд этган.
Ленинград области губернатори Александр Дрозденко эса ҳудуд узра 144 та дрон уриб туширилганини айтган. Ломоносов районида «мудофаа вазирлиги объектида» чиққан ёнғин туфайли 600 дан ортиқ киши эвакуация қилинган, тўрт киши, жумладан, бир бола яраланган.
Supernova+
«Наш город—Кронштадт» / ВКонтакте
Расмийлар айнан қайси объектлар ҳужумга учраганига аниқлик киритмаган. Astra телеграм-канали гувоҳлар томонидан олинган фото ва видеоларни таҳлил қилиб, Кронштадт денгиз кадетлари ҳарбий корпуси, сувости қуроллари яратиладиган Денгиз иссиқлик техникаси илмий-тадқиқот институти, шунингдек, Петергоф нефт базаси зарба нишонлари бўлгани ҳақида хулосага келган.
Supernova+
Ҳужум пайтида 45 минг аҳолига эга Кронштадт шаҳрига (Финн кўрфазидаги оролда жойлашган ва материк билан кўприк орқали боғланган) бир неча соат давомида кириш ва чиқиш тақиқланди. Шунингдек, шаҳарда пайшанба куни бошланган ва якшанбагача давом этиши керак бўлган «Кронштадт елканлари» номли кенг кўламли мусиқа ва спорт фестивали ҳам бекор қилинди.
Украина дронлари Санкт-Петербург шаҳри ва областидан ташқари Россиянинг бошқа регионларига ҳам ҳужум қилган. РФ мудофаа вазирлиги 376 та зарбдор дрон йўқ қилингани ҳақида ҳисобот берган.
