Германияда келгуси йилларда газ нархи юқори бўлиши кутилмоқда 

Германиянинг RWE энергетика компанияси бош директори Маркус Креббернинг фикрича, Россиянинг Украинага бостириб кириши муносабати билан газ ва электр энергияси нархи яна 3-5 йил давомида юқорилигича қолади. «Янги қувватлар ишга тушиши ва бошқа давлатлар қўшимча энергия етказиб бериши учун вақт керак бўлади», деди у 20 июнь, душанба куни Süddeutsche Zeitung газетасига берган интервьюсида. 

Креббер Германия вице-канцлери Роберт Ҳабекнинг табиий газни тежаш мақсадида кўмирда ишлайдиган электр станцияларини кўпроқ ишлатиш ташаббусини олқишлади. «Бошқа энергия манбаларига ўтиш мумкин бўлган барча соҳаларда буни қилиш керак», - деди у. RWE раҳбарининг сўзларига кўра, Россиядан газ етказиб бериш ҳажми қисқариши ҳозирдан сезилмоқда. «Биз ҳам келишилганидан анча паст ҳажмларни оламиз», деди Креббер ва компания энди ёнилғини «сезиларли даражада юқори ва кўтарилган нархларда» сотиб олишга мажбур эканлигини қўшимча қилди. 

Бироқ Креббер Германиядаги сўнгги атом электр станцияларининг 2022 йил охиридан кейин ҳам ишлашини рад этди. RWE Шимолий Рейн-Вестфалиядаги Garzweiler II кўмир конидан фойдаланишни кенгайтиришга пул тикмоқда. «Карьер қазишда режалаштирилган жараён муҳим, бу айниқса биз газни тежаш сценарийларига тайёргарлик кўраётганимизда ўта долзарб», деди Креббер.

Forsa институти томонидан ўтган ҳафта охирида Германиянинг RTL ва n-tv телеканаллари томонидан эълон қилинган сўров натижаларига кўра, немисларнинг 72 фоизи аллақачон газ ва электр энергияси, шунингдек, автомобиль ёнилғисини тежашга ҳаракат қилмоқда. 

Респондентларнинг яна 11 фоизи яқин келажакда энергияни тежашга киришишларини билдиришган. Шу билан бирга, респондентларнинг 15 фоизи бундай қилишни режалаштирмаганлигини айтди.