Исроил бош вазири лавозимини тарк этади

Исроил бош вазири Нафтали Беннет мамлакат кнессети тарқатиб юборилиши фонида лавозимини тарк этишини маълум қилди. Бу ҳақда Jerusalem Post газетаси хабар берди.

«Исроил давлатига хизмат қилиш менинг бурчим. Ўзимдан сўнг фаровон, кучли ва хавфсиз мамлакатни қолдиряпман», — деди сиёсатчи. 

Исроил ташқи ишлар вазири ва «Еш Атид» либерал партияси етакчиси Яир Лапид мамлакатнинг янги бош вазири бўлади. 

Мамлакатда парламент инқирози «Янги ўнглар» депутатлари Идит Силман ва Нир Орбак ҳукмрон коалициядан чиқишини маълум қилганидан кейин бошланди.

20 июн куни кнессетни тарқатиб юбориш ва янги сайловлар эълон қилиш тўғрисида қарор қабул қилинди. Бу Исроилда 2019 йилдан буён бешинчи марта ўтказилаётган парламент сайловлари бўлади.