Deutsche Bahn Украина донини Германия портларига ташишни бошлайди

Германиянинг Deutsche Bahn темирйўл концерни Украина донини кейинчалик бошқа мамлакатларга ташиш учун Германия портларига олиб ўтишни бошлайди. Шу мақсадларда у инсонпарварлик ёрдамини етказиб бериш учун яратилган тармоқни қайта йўналтиришни режалаштирмоқда. Бу ҳақда 20 июль, чоршанба куни концерннинг шуъба корхонаси ҳисобланган DB Cargo расмий вакили маълум қилди. 

Дон, хусусан, Бремерхавен яқинида жойлашган Росток, Ҳамбург, шунингдек, Браке портларига етказилади. Юкнинг катта қисми Украина билан катта чегарага эга ва қишлоқ хўжалиги маҳсулотларини ташиш учун зарур инфратузилмаси бор бўлган Руминия орқали келади. Юкнинг яна бир қисмини Полша орқали ташиш режалаштирилган.

«Биз имкон қадар кўпроқ дон ташишга ҳаракат қиламиз», деди DB Cargo вакили, у аниқ ҳажмларни айтмаган. Reuters хабарига кўра, Deutsche Bahn ҳафтасига бир неча поезд жўнатишни режалаштирмоқда. 

Июнь ойида Руминиянинг Қора денгиздаги Констанц порти бош директори Флорин Гойдя Украина ғалласини Руминия орқали экспорт қилишни ташкил этиш тезкор ҳал бўлмайдиган вазифа эканлигини айтди. Ўз навбатида, Руминия президенти Клаус Йоханнис бу вазифани транспорт инфратузилмаси йўқлигига ишора қилиб, «эпик кўламнинг логистик муаммоси» деб атади. 

Украина аграр сиёсат ва озиқ-овқат вазири Николай Солский тақдим этган сўнгги маълумотларга кўра, мамлакатдан 18 миллион тонна эски ҳосилдаги донни олиб чиқиш керак. Янги ҳосилдан экспорт учун яна 40 миллион тонна кутилмоқда. Американинг Wall Street Journal газетаси хабар беришича, 13 июль куни Истанбулдаги музокаралар чоғида Украина, Россия, Туркия ва БМТ вакиллари дон экспорти учун Украина учта портининг деблокадаси тўғрисида келишиб олди.