Зангиотадаги трансформаторда йирик ёнғин содир бўлди

Ижтимоий тармоқларда Бек Барака бозори атрофидаги дўконларда катта ёнғин бўлаётгани ҳақида хабарлар тарқалди. ФВВ ҳолат юзасидан маълумот берди.

Фото: ФВВ матбуот хизмати

Бугун, 26 июль куни соат 16:05 да Тошкент вилояти Зангиота тумани Эшонгузар қўрғони Тошкент ҳалқа автомобиль йўли четида жойлашган трансформаторда ёнғин содир бўлаётгани тўғрисида вилоят ФВБга хабар келиб тушган.

Шунга кўра, 5 та ёнғин-қутқарув экипажи соат 16:13 да воқеа жойига етиб борган, трансформатор ҳудудий электр тармоқлари корхонаси мутахассислари томонидан электр тармоғидан узилгандан сўнг ёнғин соат 16:21 да тўлиқ бартараф этилган.

Ёнғин натижасида ён-атрофдаги бино иншоотларга зарар етмаган. Ҳодиса оқибатида тан жароҳати олган ва ҳалок бўлганлар йўқ.

Билдирилишича, ҳозирда ёнғин сабаби ва келтирилган зарар миқдори аниқланмоқда.