Афғонистон ва Хитой ТИВ раҳбарлари Тошкентда музокара ўтказди

Тошкентда Афғонистон ва Хитой ташқи сиёсат идоралари раҳбарларининг ўзаро учрашуви бўлиб ўтди. Бу ҳақда “Толибон” ҳаракати матбуот котиби ўринбосари Ҳофиз Зиё Аҳмад “Твиттер”да хабар берди.

Фото: Twitter / Ҳофиз Зиё Аҳмад

“Кеча кечқурун Тошкентда ташқи ишлар вазири Амир Хон Муттақий ва Хитой Халқ Республикаси ташқи ишлар вазири Ван И ўртасида икки томонлама учрашув бўлиб ўтди”, дея маълум қилди Ҳофиз Зиё Аҳмад .

Унинг сўзларига кўра, учрашувда Афғонистон ва Хитой ўртасидаги икки томонлама муносабатлар, Афғонистондаги иқтисодий вазият муҳокама қилинган.

Бундан олдин Ўзбекистон ташқи ишлар вазири в.б. Владимир Норов халқаро конференцияда иштирок этиш учун мамлакатга ташриф буюрган Афғонистон ташқи ишлар вазири в.б. Амир Хон Муттақий билан учрашганди.

Амир Хон Муттақий Афғонистон ҳудуди бундан буён Ўзбекистон ва минтақа бошқа давлатлари учун хавф туғдирмаслигини билдирди.