БМТ: Шимолий Корея 2017 йилдан бери биринчи ядровий синовга тайёрланмоқда

Шимолий Кореянинг «Пунгери» ядро полигонидаги иш КХДР ядро қуролини синовдан ўтказишга тайёрланаётганидан далолат беради, дейилади БМТ ҳисоботида.

Фото: Reuters

БМТ маълумотларига кўра, Шимолий Корея 2017 йилдан буён илк ядро синовини ўтказишга тайёрланмоқда. Сўнгги ойларда мамлакат шимолидаги ерости полигонида қурилиш ишлари олиб борилаётгани кузатилмоқда. Бу ҳақда 5 август, жума куни БМТнинг махфий ҳисоботига таяниб, dpa агентлиги хабар берди.

«Пунгери» ядро полигонидаги ишлар ядровий қурол яратиш учун қўшимча ядро синовларини ўтказишга замин яратмоқда», — дейилади ҳисоботда. БМТнинг таъкидлашича, бу жойнинг сунъий йўлдошдан олинган суратлари КХДР «Пунгери»даги туннеллар тармоғини таъмирлаётгани, шунингдек, 2018 йилда АҚШ билан музокаралар чоғида бузиб ташланган иншоотларни тиклаётганини кўрсатмоқда.

Кузатувчилар бир неча ойдан бери Шимолий Корея кўп сонли ракета синовларидан сўнг сўнгги беш йил ичида илк ядровий синовини ўтказиши мумкинлигидан хавотирда. Июнь ойида Атом энергияси халқаро агентлиги (АЭХА) ҳам КХДР 2006 йилдан 2017 йилгача олтита ядровий синов ўтказган «Пунгери» полигонида фаолликни қайд этган эди.