Apple ўз смартфонлари учун чипсетлар ишлаб чиқарадиган Тайваннинг TSMC компаниясидан маҳсулотларни «Тайван, Хитойда ишлаб чиқарилган» ёки «Тайван, Хитой» ёрлиқлари билан экспорт қилишни сўради. Чипсетлар Хитойга – iPhone'лар йиғиладиган энг катта заводларга етказиб берилади.
Бу масала 2-3 август кунлари АҚШ Конгресси Вакиллар палатаси спикери Ненси Пелосининг Тайванга ташрифи ортидан кучайган зиддият туфайли етказиб беришда узилишлар бўлмаслиги учун кўтарилган.
Пелосининг ташрифига жавобан Хитой орол билан савдо алоқаларини қисман тўхтатиб, баъзи маҳсулотлар учун текширувни кучайтирмоқда. Хусусан, чипсетлардаги «Тайванда ишлаб чиқарилган» деган ёзув маҳсулотларнинг божхонада узоқ вақт ушланиб қолишига ёки умуман Хитойга киритилмаслигига сабаб бўлиши мумкин.
The Guardian нашрига кўра, Тайван экспорт маҳсулоти «Тайван» номи билан ёки давлатнинг расмий номи «Хитой Республикаси» деб ёзилишини талаб қилмоқда.
Ушбу муаммо сабабли сентябрда бўлиши кутилаётган iPhone 14 линиясидаги телефонларнинг тақдимоти кечикиши тахмин қилинмоқда.
Лекин купертиноликлар аллақачон iPhone 14 тақдимотини тасвирга олиш жараёнларини бошлаб юборган. iPhone 14 линиясининг энг арзон қурилмаси 800 АҚШ долларидан, Max турлари эса 1200 доллардан бошланиши кутилмоқда.
Тақдимот 13 сентябрда, сотувлар эса 23 сентябрдан бошланиши кутилмоқда.
