Бухорода «права» олиб беришни ваъда қилган шахс ушланди

Бухоро вилоятида ҳайдовчилик гувоҳномасини олиб беришни ваъда қилган фирибгар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Бош прокуратура ҳузуридаги департаментнинг Бухоро вилоят бошқармаси, Давлат хавфсизлик хизмати ва Ички ишлар бошқармаси ходимлари билан ҳамкорликда тезкор тадбир ўтказилган.

Унда, фуқаро Ж.К. бошқа бир фуқаро Ж.га, танишлари ёрдамида ҳайдовчилик гувоҳномасини ўқув машғулотларига қатнашмасдан олиб бериш эвазига 2,2 млн сўм ва 200 АҚШ долларини олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилди.

Хабарда айтилишича, ҳозирда тергов ҳаракатлари ўтказилмоқда.