Қўшимча функционаллар
-
Тунги кўриниш
Тайван Хитойнинг «бир давлат - икки тизим» режасини рад этди
«Фақат Тайван халқи ўз келажагини ҳал қилиши мумкин», деди Тайван ТИВ вакили. Пекин Пелосининг оролга ташрифидан «статус-квони йўқ қилиш учун баҳона» сифатида фойдаланмоқда, деди у.
Тайван Пекин томонидан тинч йўл билан бирлашиш учун асос сифатида таклиф қилинган «бир давлат - икки тизим» моделини рад этади. Бу ҳақда Тайван ТИВ расмий вакили Жоан Оу 11 август, пайшанба куни Тайбэйда бўлиб ўтган матбуот анжуманида маълум қилди. «Фақат Тайван халқи ўз келажагини ҳал қилиши мумкин», деди у.
Пекин томонидан таклиф қилинаётган «бир давлат – икки тизим» модели Ҳонгконг ва Макаога нисбатан қўлланилган, уларга Хитой юрисдикциясидан ўтганидан сўнг кенг автономияга эга бўлган махсус маъмурий мақом ваъда қилинганди.
АҚШ Конгресси Вакиллар палатаси спикери Нэнси Пелосининг ташрифи муносабати билан Хитой орол атрофида бошлаган кенг кўламли ҳарбий машғулотларини расман якунлаганидан сўнг, пайшанба куни Тайван армияси навбатдаги жанговар ўқ узиш машқларини ўтказди.
Тайван ТИВ вакили айтишича, Хитой Пелосининг ташрифидан «статус-квони йўқ қилиш учун баҳона сифатида фойдаланиб, Тайван халқини қўрқитиш мақсадида янги норма яратиш»ни кўзлаган.
Нэнси Пелоси 2 август куни Тайванга бир кунлик ташриф учун учиб келди. У 25 йил ичида Пекин мустақиллигини тан олмайдиган ва Хитой провинцияларидан деб кўрувчи оролга ташриф буюрган АҚШ Конгресси Вакиллар палатасининг биринчи спикери бўлди.
Оқ уй ва Пелосининг ўзи таъкидлашича, Вашингтон ҳам мустақиллигини тан олмайдиган Тайванга ташриф АҚШ позицияси ўзгарганини англатмайди. Расмий Пекин шунга қарамай, бундай ташрифни кескин танқид қилди, Пелоси кетганидан кейин Хитой армияси орол ҳудудида аввал эълон қилинган ҳаво ва денгиз ҳарбий машғулотларини бошлади. Тайван Мудофаа вазирлиги Хитой машқларини ўта провокацион деб атади ҳамда ерустидан қўлланилувчи ракета тизимлари жойлаштирилишини эълон қилди.
Пекин Пелосининг ташрифидан сўнг Тайван билан савдо-сотиқни қисман тўхтатди. Бундан ташқари, Хитой ТИВ АҚШ билан қатор соҳалар, жумладан, иқлим ўзгариши масаласи бўйича ҳамкорликни тўхтатганини маълум қилди. Хитой Пелосининг ўзига ва унинг оила аъзоларига «Хитойнинг ички ишларига аралашгани» ва «мамлакат ҳудудий яхлитлигини бузгани учун» санкциялар киритди.
