Бўш турган давлат объектлари ижарага берилади ёки сотилади

Бўш турган давлат ва давлат иштирокидаги хўжалик жамиятлари объектларини улар розилигисиз ижарага бериш ёки сотиш учун савдога чиқариш тартиби лойиҳаси эълон қилинди.

Вазирлик ва идоралар, маҳаллий давлат ҳокимияти органлари, давлат иштирокидаги корхоналарга тегишли хатлов натижасида аниқланган уч ойдан ортиқ муддат (ижтимоий соҳа объектлардан ташқари) объект улар розилигисиз ижарага бериш ёки сотиш тартибга мувофиқ савдоларга чиқарилади.

Вазирлик ва идоралар, маҳаллий давлат ҳокимияти органлари, давлат иштирокидаги корхоналарга тегишли уч ойдан ортиқ бўш турган объектларини улар розилигисиз ижарага бериш ёки сотиш учун савдога чиқариш схема бўйича амалга оширилади.

Ижарага берувчи томонидан хатлов давомида аниқланган объект ахборот тизимига бўш турган объект сифатида киритилиб, рўйхати шакллантирилади.

Объект аниқланиб, ахборот тизимига киритилгандан сўнг уч кун муддатда уни балансида сақловчига бир ой муддатда объектдан самарали фойдаланиши, акс ҳолда объект ижарага бериш ёки сотиш учун савдога чиқарилиши тўғрисида ижарага берувчи томонидан огоҳлантириш хати юборилади.

Ахборот тизимига киритилган кундан бошлаб уч ойдан ортиқ вақт давомида бўш турган давлат объектларини савдога чиқариш учун ижарага берувчи ва сотувчи вакиллари биргаликда жойига чиққан ҳолда:

• бўш турган объект жойлашган жойи;
• ихтисослиги (агар мавжуд бўлса);
• мулкчилик шакли;
• ҳолати (фойдаланишга яроқлилиги);
• кадастр ҳужжатларига мувофиқ объект умумий ер майдони ва бино-иншоотлар эгаллаган майдони ҳамда балансда сақловчиси (мулкдори);
• объект бўш турган муддати (объект бўш тургани биринчи марта аниқланган кундан бошлаб ҳисобланади);
• бўш турган объект президент, Вазирлар Маҳкамаси, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари томонидан дастурга киритилгани ҳамда тармоқ жадвалида мавжудлиги ёки мавжуд эмаслиги;
• хусусийлаштириш дастурларига киргани, объектдан келгусида самарали фойдаланиш бўйича ваколатли орган қарори мавжудлиги;
• объект ҳақидаги, шу жумладан объектга нисбатан тақиқ (чеклов) мавжудлиги ўрганилади ва улар ҳақидаги маълумотлар ҳамда объектлар кадастр паспорти нусхалари ахборот тизими орқали олинади.

Объект қуйидаги ҳолларда ижарага бериш учун электрон онлайн-аукцион савдоларига чиқарилади:

• президент, Вазирлар Маҳкамаси, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари томонидан ижтимоий-иқтисодий ривожлантириш дастурларига киритилган, объектдан самарали фойдаланиш бўйича тармоқ жадвали мавжуд ва қисман бўш (хона, майдон) турганда;
• объект балансда сақловчиси томонидан бино-иншоотларидан келгусида ўз соҳасида фойдаланиш эҳтиёжи мавжудлигини, камида 5 йиллик демографик ўсиш даражасини инобатга олган ҳолда аниқ ҳисоб-китобларга асосланган таклифларни ижарага берувчига тақдим этган тақдирда.

келтирилган талабларга мувофиқ бўлмаган, алоҳида турган тўлиқ бўш, фойдаланишга яроқли объект белгиланган тартибда сотиш учун электрон онлайн-аукцион савдоларига чиқарилади.

Ўрганиш натижаларига кўра, ижарага берувчи ва сотувчи томонидан объектни ихтисослигидан келиб чиқиб ижарага бериш ёки сотиш юзасидан далолатнома расмийлаштирилади ва бу ҳақда икки иш кунида объект балансда сақловчисига хабарнома юборилади.

Ижарага берувчи томонидан объектни ижарага бериш ёки сотиш тўғрисида ахборот тизимига маълумот киритилади.