Қрим раҳбари Сергей Аксёнов яриморолни Россия билан боғловчи кўприкда транспорт воситалари ҳаракати қисман тикланганини эълон қилди.
«Айни вақтда тўлиқ кўрикдан ўтган автомобиллар ва автобуслар учун ҳаракат очиқ. Юк автомобиллари ҳайдовчиларидан Керчь паром кечуви орқали йўналишни режалаштиришини сўраймиз. Икки соатдан кейин паром ҳаракати ишга туширилади», деб ёзди у телеграм каналида.
Аввалроқ, Қрим яриморолини Россиянинг қуруқликдаги қисми билан боғловчи кўприкда йирик ёнғин содир бўлган эди. Кейинчалик маълум бўлишича, кўприкда юк ортилган автомобил портлаб кетган. Зарба тўлқини оқибатида темир йўлдан ҳаракатланаётган юк поездининг цистерналарида ёнғин чиққан. Миллий антитеррористик қўмита ҳодисани қўпорувчилик ҳаракати деб баҳолади.
Россия Тергов қўмитаси хабарига кўра, портлаш оқибатида уч киши ҳалок бўлган. Уларнинг автомобили портлаб кетган юк автомобилини қувиб ўтаётганида зарба тўлқини остида қолган.
Юк автомобилининг эгаси ҳам аниқланган. У Россиянинг Краснодар вилоятида истиқомат қилувчи шахс бўлиб чиққан. Унинг яшаш жойида суриштирув ҳаракатлари бошланган.
Маълумот учун, Россия 2014 йил Украинанинг Қрим яриморолини эгаллаб олгач, ҳудудни Россиянинг қуруқликдаги қисми билан боғлаш учун Керч кўпригини қурган эди. Украина уруш бошланганидан буён Қрим кўпригига зарба беришга ҳақли эканини айтиб келаётган эди.
