Россиянинг миграция сиёсати ўзгартирилади

Россия президенти Владимир Путин миграция сиёсатининг амалдаги концепциясига ўзгартириш киритиш зарурлигини айтди.

Фото: РИА Новости

Унинг сўзларига кўра, концепцияда барча «эҳтимолий хатарлар» ҳисобга олиниши керак. Хавфсизлик кенгаши котиби Николай Патрушев сўзларига кўра, миграция сиёсатини кучайтирувчи тузатишлар 2022 йил охиригача қабул қилинади.

«Ҳозир миграция соҳасига таъсир этувчи «маънавий ва минтақавий омиллар» пайдо бўлмоқда. Биз бу ўзгаришларга ўз вақтида ва самарали жавоб беришимиз керак», деди Владимир Путин.

«Шубҳасиз, давлат миграция сиёсатининг амалдаги концепциясини тузатиш зарур. У барча мавжуд ва эҳтимолий муаммоларни тўлиқ ҳисобга олиши, қонунчиликни янада такомиллаштириш учун асос бўлиши керак», деди президент Хавфсизлик кенгаши йиғилишида.

Президент маъмурият ва ҳукуматга 2025 йилгача миграция режими ва фуқаролик институтини ислоҳ қилиш бўйича топшириқ берди.

Николай Патрушев сўзларига кўра, миграция сиёсатига киритиладиган ўзгартиришлар мигрантлар ихчам яшайдиган жойларда ҳуқуқ-тартиботни сақлаш бўйича кенг кўламли чора-тадбирларни ўз ичига олади. Шунингдек, мамлакатда бўлиш қоидаларини бузганлик учун жавобгарлик кучайтирилади. Миграция каналлари орқали халқаро террорчиларни аниқлаш чоралари кўрилади.

#Владимир Путин #миграция #Россия

Kun.uz янгиликларини Google News'да кузатинг

+ Обуна бўлиш