Словенияда президентлик сайловларининг иккинчи босқичи ўтказилади

Сайлов бюллетенларининг 99 фоизини қайта ишлагандан сўнг, Словения собиқ ташқи ишлар вазири Анже Логар президентлик сайловларида 34 фоизга яқин, адвокат Наташа Пирц-Мусар деярли 27 фоиз овоз олди.

Фото: DW

Словенияда бўлиб ўтган президентлик сайловларида бюллетенларнинг 99,93 фоизини қайта ишлаш натижаларига кўра, республика Ташқи ишлар вазирлигининг собиқ раҳбари, Словения Демократик партиясидан депутат Анже Логар етакчилик қилмоқда. Бу ҳақда 23 октябр, якшанба куни мамлакат Давлат сайлов комиссияси сайтида хабар берилди.

Логар 33,96 фоиз овоз тўпламоқда. Иккинчи ўринда партиясиз номзод, ҳуқуқшунос Наташа Пирц-Мусар 26,87 фоиз овоз билан, учинчи ўринда Европарламент аъзоси, Социал-демократлар ва «Озодлик» ҳаракатидан номзод Милан Брглез 15,41 овоз тўплаган ҳолда бормоқда.

Сайловда етти нафар номзод иштирок этди. Ҳеч бир номзод ярмидан кўп овоз ололмагани учун 13 ноябрь куни энг кўп овоз олган икки номзод ўртасида иккинчи тур ўтказилади. Янги давлат раҳбари 23 декабрда, Словениянинг амалдаги президенти Борут Паҳорнинг беш йиллик ваколати тугаши билан ўз лавозимига киришиши керак. Словения парламентли республика, шунинг учун мамлакат президентининг функциялари чекланган.

Роберт Голоб раислигидаги марказий сўл «Озодлик» ҳаракати жорий йилнинг апрель ойида бўлиб ўтган парламент сайловларида 34,54 фоиз овоз билан ғалаба қозонган эди. Бош вазир Янез Яншанинг ўнг марказчи Словения Демократик партияси 23,53 фоиз овоз олган.