Эронда биргина мамлакат пойтахтида бўлиб ўтган ҳукуматга қарши намойишларда қатнашган 300 дан ортиқ одамга айблов қўйилди. Суд органлари маълумотларига кўра, уларнинг баъзилари ўлим жазосига маҳкум этилиши мумкин.
Эронда давом этаётган намойишлар чоғида қўлга олинган тўрт киши ўлим жазосига ҳукм қилиниши мумкин. Улар Эрон қонунчилигига кўра ўта оғир жиноят сифатида баҳоланадиган ва ўлим билан жазоланиши мумкин бўлган «мохареб» – «Яратганга қарши уруш»да айбланмоқда. Бу ҳақда Теҳрон бош прокурори Али Солиҳий 25 октябр, сешанба куни хабар қилди.
Солиҳийнинг Misan Online суд портали томонидан келтирилган сўзларига кўра, тўрт «исёнчи» шунингдек, ноқонуний қурол олиб юриш, ҳуқуқ-тартибот идоралари ходимларини жароҳатлаш, мамлакат хавфсизлигига путур етказиш, давлат мулкини йўқ қилиш ва ўт қўйишда айбланмоқда.
Эрон пойтахтида жами 315 кишига «мамлакат хавфсизлигига путур етказиш мақсадида йиғилиш ва тил бириктириш», «ҳукуматга қарши тарғибот олиб бориш» ҳамда «жамоат тартиби ва тинчлигини бузиш» айбловлари қўйилди, деди Солиҳий. Эроннинг Алборз вилояти Бош прокуратураси раҳбари Ҳусайн Фазели-Хариканди яна 200 га яқин намойишчиларга нисбатан айблов қўйилганини маълум қилди.
Эрондаги оммавий норозилик намойишлари сентябр ойи ўрталаридан бери тинмаяпти. Бунга 22 ёшли курд қиз Маҳса Аминийнинг ўлими сабаб бўлган. У 13 сентябрь куни Теҳронда полиция томонидан ҳибсга олинган ва бир неча кундан кейин вафот этган. Полициянинг таъкидлашича, қиз бўлимда ўзини ёмон ҳис қилган, у ердан касалхонага олиб кетилган ва у ерда тез орада вафот этган. Яқинларининг сўзларига кўра, ўлимга ҳибсга олиш вақтидаги калтаклар сабаб бўлган.
Эроннинг 100 га яқин шаҳрида норозилик намойишлари давом этмоқда. Намойишчилар дастлаб Аминийнинг ўлимида айбдорларнинг тергов қилиниши ва жазоланишини талаб қилган бўлса, вақт ўтиши билан шиорлар ижтимоий-сиёсий шиорларга, жумладан, режимни ўзгартиришга чақириқларга ўзгарди. Октябрь ойи ўрталарида норозилик намойишларига нефтчилар қўшилди.
Мамлакат ҳукумати норозилик намойишларини хориждан уюштирилган деб аёвсиз бостиришда давом этмоқда. ОАВ хабарларига кўра, октябрь ойи ўрталарида 1,5 мингга яқин намойишчи: аёллар ҳаракати фаоллари, рассомлар, мухолифат сиёсатчилари, спортчилар, талабалар ҳибсга олинган.
Намойишлар чоғида, Эрондаги Инсон ҳуқуқлари ташкилоти, шунингдек, Human Rights Watch инсон ҳуқуқлари ташкилоти маълумотларига кўра, 200 дан ортиқ одам, жумладан, 23 бола ҳалок бўлган.
