БАА Эронга қарши яширин ҳужумлар уюштиргани маълум бўлди

Маълум қилинишича, Абу-Даби расман Эронга қарши ҳужумларни тан олмаган. Бироқ нашр манбаларига кўра, 2026 йил апрель ойи бошида БАА қуролли кучлари Форс кўрфазида жойлашган Эроннинг Лаван оролидаги нефтьни қайта ишлаш заводига зарба берган.

Айни шу даврда АҚШ президенти Дональд Трамп АҚШ ва Исроилнинг Эронга қарши урушида ўт очишни тўхтатиш бўйича келишув эълон қилган эди. Нашрнинг ёзишича, Вашингтон томонидан эълон қилинган сулҳ ҳали кучга кирмагани учун АҚШ ушбу ҳужумдан норози бўлмаган.

Эрон томони ўша вақтда Лаван оролидаги нефтни қайта ишлаш заводи ташқи ҳужумга учраганини билдирган. Шундан сўнг Теҳрон БАА ва Кувайтга қарши ракета ҳамда дронлар ёрдамида бир қатор ҳужумлар уюштирган.

WSJ суҳбатдошларидан бирига кўра, АҚШ Форс кўрфазидаги давлатларнинг Эронга қарши ҳарбий ҳаракатларда иштирок этишини “жим ҳолда қўллаб-қувватлаган”.

БАА Ташқи ишлар вазирлиги вакиллари Лаван оролига эҳтимолий зарба юзасидан изоҳ беришдан бош тортган. Шу билан бирга, расмийлар мамлакат ўз хавфсизлигига таҳдидларга, жумладан ҳарбий усуллар орқали ҳам жавоб қайтариш ҳуқуқини сақлаб қолишини билдирган.

Пентагон ҳам ушбу масала юзасидан расмий шарҳ бермаган.

Нашр маълумотларига кўра, уруш бошланганидан буён Эрон БААга қарши жами 2800 та дрон ва ракета қўллаган. Бу бошқа ҳар қандай давлатга, ҳатто Исроилга нисбатан ҳам кўпроқ экани таъкидланган.

Ҳужумлар оқибатида БААда авиақатновлар, туризм ва кўчмас мулк бозорига жиддий зарар етган. Қатор компанияларда ходимлар қисқартирилган ёки маошсиз таътилга чиқарилган.

WSJ таъкидлашича, мазкур воқеалар БААнинг стратегик ёндашувини ҳам ўзгартирган. Энди Эрон мамлакат иқтисодий ва ижтимоий моделига таҳдид солувчи “яккаланган давлат” сифатида баҳоланмоқда.

Нашрга кўра, БАА кучли ҳарбий авиацияга эга бўлиб, унинг арсеналида Франциянинг Mirage ҳамда АҚШнинг замонавий F-16 қирувчи самолётлари мавжуд. Амирлик ҳарбий учувчилари юқори тайёргарлик даражаси билан ажралиб туради.