Қўшимча функционаллар
-
Тунги кўриниш
Жоржиядаги сайловлар АҚШ Сенатидаги кўпчилик ўрин учун курашни ҳал қилади
Жоржия штатида биринчи турда ҳеч бир номзод 50 фоиздан кўп овоз тўплай олмади. Бу штатдаги сайловлар АҚШ Сенатидаги кўпчилик ўрин учун курашда асосий омил бўлиши мумкин.
Жоржияда АҚШ Сенатига сайловнинг иккинчи босқичи 6 декабрга белгиланган. Бу ҳақда 9 ноябрь, чоршанба куни Жоржия штати давлат котиби Бред Раффенспергер маълум қилди.
Биринчи овоз бериш жараёнида ҳеч бир номзод ушбу штатда ғалаба қозониш учун зарур бўлган овозларнинг ярмидан кўпини ололмади. Демократик номзод, Жоржия штатидан амалдаги сенатор Рафаэл Уорнок 49,4 фоиз, унинг республикачи рақиби Хершел Уокер 48,5 фоиз овоз олди. Учинчи номзод Чейз Оливернинг натижаси эса 2,1 фоизни ташкил этди.
Жоржиядаги иккинчи тур натижалари АҚШ Конгрессининг юқори палатаси, Сенат устидан назоратни ким - демократлар ёки республикачилар қўлга киритишини аниқлаб бериши эҳтимоли юқори. Яна иккита муҳим штат - Аризона ва Невадада ҳамон овозларни санаш давом этяпти. Аризона штатида, бюллетенларнинг 67 фоизи қайта ишлангандан сўнг, демократ Марк Келли 51 фоиз овоз билан, Невада штатида эса, бюллетенларнинг 77 фоизи қайта ишлангандан сўнг, республикачи Адам Лаксал 50 фоиз натижа билан ғалаба қозоняпти.
Агар бу штатларда мавжуд тенденциялар давом этса, айнан Жоржиядаги сайловлар натижаси демократлар Сенатдаги 100 ўриндан 50 тасини қўлга кирита олишини аниқлаштириб беради. Агар улар бунга муваффақ бўлса, унда бу кўпчилик ўринни қўлга киритиш учун етарли бўлади - чунки қонунга кўра, ҳар икки партиядан тенг миқдордаги сенаторлар бўлган ҳолатда АҚШ вице-президенти овоз бериш ҳуқуқига эга. Ҳозирда бу лавозимни демократлар вакили Камала Харрис эгаллаб турибди.
Шу билан бирга, Республикачилар партияси аъзолари АҚШ Вакиллар палатасида кўпчиликни ташкил қилиши ва губернаторлик сайловлари Конгрессга оралиқ сайловлар билан бир вақтда ўтказилаётган АҚШнинг аксарият штатлари ва ҳудудларида кўпчилик ўринга эришиши мумкин.
Бред Раффенспергер - республикачи. Бироқ, 2020 йилги АҚШ президентлик сайловлари пайтида, ОАВ хабарларига кўра, у ўзининг партиядоши, ўша пайтдаги президент Доналд Трампнинг Жоржия давлат котибидан Байден устидан ғалаба қозониши учун етишмаётган 11 780 овозни «топиб беришни» талаб қилганига қаршилик кўрсатган. Буни The Washington Post нашри чоп этган суҳбатнинг аудиоёзуви тасдиқлайди.
