АҚШ ва иттифоқчилари Полшадаги портлаш бўйича суриштирувга ёрдам беради

Қўшма Штатлар ва унинг НАТОдаги иттифоқчилари Полшада икки кишининг ҳаётига зомин бўлган портлаш бўйича суриштирув ишларига ёрдам беради, бироқ дастлабки маълумотларга кўра, унга сабаб бўлган ракета Россиядан учирилган бўлиши мумкин эмас, деб маълум қилди АҚШ президенти Жо Байден. У 16 ноябрь, чоршанба куни Индонезиянинг Бали оролида G20 йиллик саммитига йиғилган дунё етакчиларининг фавқулодда йиғилишидан сўнг журналистлар билан суҳбатлашди. 

Ракета Россия ҳудудидан учирилган деб айтишга ҳали эртами, деган саволга Байден шундай жавоб берди: «Буни инкор этувчи дастлабки маълумотлар бор. Тўлиқ текширмагунимизча бу ҳақда гапиришни истамайман, лекин траектория нуқтайи назаридан, у Россиядан учирилгани даргумон». АҚШ ва НАТО давлатлари қандайдир ҳаракат қилишдан олдин тўлиқ суриштирув ўтказади, дея қўшимча қилди у.

Байден G7 давлатлари ва НАТО етакчилари билан фавқулодда йиғилиш ўтказди ҳамда Полшанинг Украина билан чегарадош Пшеводув қишлоғида содир бўлган воқеани муҳокама қилди. У ерда, Полша Ташқи ишлар вазирлиги ва Украина расмийларига кўра, Россияда ишлаб чиқарилган ракета қулаган.

«Биз Полшанинг шарқий қисмида Украина билан чегарага яқин жойда содир бўлган портлашни муҳокама қилдик. Полша томонидан олиб борилаётган суриштирувни тўлиқ қўллаб-қувватлаймиз ва ёрдам берамиз. Суриштирув жараёнида тегишли кейинги қадамларни аниқлаш учун яқин алоқаларни давом эттиришга келишиб олдик», - дейилади АҚШ, Канада, Франция, Германия, Италия, Япония, Нидерландия, Испания ва Буюк Британия раҳбарлари, шунингдек, ЕИ вакиллари йиғилишдан кейин эълон қилинган қўшма баёнотда. 

Йиғилиш иштирокчилари, шунингдек, 15 ноябрь куни Россия томонидан Украина шаҳарлари ва фуқаролик инфратузилмасига уюштирилган ракета ҳужумларини қоралади. Улар Россиянинг давом этаётган тажовузи қаршисида Украина ва украин халқини қўллаб-қувватлашларини, шунингдек, Россияни жавобгарликка тортишга тайёр эканликларини яна бир бор тасдиқладилар. 

Полшадаги портлаш муносабати билан БМТ бош котиби Антониу Гутерриш Украинада уруш авж олишининг олдини олишга чақирди. «Антонио Гутерриш Полшада ракета портлаши ҳақидаги хабарлардан жуда хавотирда. Украинада уруш авж олишига йўл қўймаслик зарур», - деди унинг матбуот котиби Twitter’да ва БМТ бош котиби қурбонларнинг оилаларига ҳамдардлик билдирганини қўшимча қилди.