Россияда «хорижий агентлар» реестри яна олти киши билан тўлдирилди

Россия Адлия вазирлиги жисмоний шахслар - «хорижий агентлар» реестрини яна олти нафар шахс билан тўлдирди. Бу Адлия вазирлигининг 25 ноябрь, жума куни эълон қилинган янгиланган рўйхатидан келиб чиқади. «Хорижий агент» мақоми Екатеринбургнинг собиқ мэри Эвгений Ройзман, адвокат Иля Новиков, Алексей Навалнийнинг Уфадаги штаби собиқ адвокати Федор Телин, Пермдаги «Голос» ҳаракати координатори Виталий Ковин, «Дожд» телеканалининг ижодий продюсери Анна Монгайтга, шунингдек, «Свободная Бурятия» раҳбари, журналист Александра Гармажаповга берилди. Олти кишида ҳам Украина молиялаштирувчи давлат сифатида кўрсатилган, Анна Монгайтга эса Латвиядаги SIA «TV Rain» юридик шахси ҳам бириктириб қўйилди.

Сахалинлик журналист Любов Барабашова «ОАВ-хорижий агент» деб тан олинган шахслар реестрига, Санкт-Петербургдаги ташаббус гуруҳи, шунингдек, «Социальное партнерство» инсон ҳуқуқлари жамғармаси «рўйхатдан ўтмаган бирлашмалар-хорижий агентлар» рўйхатига киритилди.

2012 йилда Давлат думаси депутатлари «Нодавлат нотижорат ташкилотлари тўғрисида»ги қонунга ўзгартишлар киритди, унга кўра Россия Федерацияси ҳудудида «сиёсий фаолият» билан шуғулланадиган ва чет элдан молиялаштириш қабул қилувчи Россия нодавлат нотижорат ташкилотларига «хорижий агент» мақоми берилади. Шу билан бирга, қонунда «сиёсий фаолият» тушунчасига аниқ таъриф берилмаган.

2017 йилда Россияда «ОАВ-хорижий агентлар» тўғрисидаги қонун қабул қилинди, унга кўра бу мақом чет элдан молия ва мулк оладиган ҳар қандай ОАВга берилиши мумкин. 2018 йилда шахсларни «ОАВ-хорижий агентлар» рўйхатига ижтимоий тармоқлардаги постлар учун ҳам киритишга рухсат берувчи қонун қабул қилинди.

2022 йил 1 декабрдан бошлаб Россияда нафақат хориждан маблағ оладиган, балки чет элдан «кўмак» олганларни (масалан, ташкилий-услубий ёки илмий-техник), шунингдек, «хорижий таъсир остида» бўлганларни «хорижий агентлар» деб эълон қилиш имконини берувчи қонун кучга киради.