Берлин: Шольц Украина масаласида Путин билан бевосита алоқада

Қайси шартларда, қаерда ва қачон тинчлик музокараларини ўтказишни ҳал қилиш ҳуқуқи Украинага тегишли, дея таъкидлади Германия Ташқи ишлар вазирлиги.

Олаф Шольц / Фото: Getty Images

Германия канцлери Олаф Шольц Украинадаги уруш муносабати билан вақти-вақти билан Россия президенти Владимир Путин билан бевосита гаплашиб туради. Европа Иттифоқидаги бошқа сиёсатчилар ҳам Россия билан дипломатик алоқада. Бу ҳақда Германия ҳукумати расмий вакили ўринбосари Кристиан Хоффман 2 январь, душанба куни DW мухбирининг Москва Берлиндан Украинада тинчлик музокараларини бошлаш бўйича таклифларни оляптими, деган саволига жавоб берар экан, маълум қилди.

«Бундан ташқари, шуни таъкидлаш мумкинки, Россия билан алоқа ва суҳбатлар йўқ деб тахмин қилиш нотўғри бўларди. Маълумки, федерал канцлер ҳам, ЕИдаги бошқа сиёсатчилар ҳам доимий равишда президент Путин билан бевосита алоқа ўрнатган. Бошқа даражаларда, албатта, алоқалар сақланмоқда. Бу соҳада сукунат ўрнатилган деб ўйлаш нотўғри», деди Хоффман.

Бундан олдин Германия Ташқи ишлар вазирлиги матбуот котиби Кристиан Вагнер DW'нинг саволига жавобан шундай деди: «Биз Украина қандай шароитда, қачон ва қандай музокаралар олиб боришини (Россия билан урушнинг тугаши тўғрисида) ўзи белгилаши кераклигини бир неча бор айтдик».

Шу билан бирга, Вагнер Германия ТИВ нуқтайи назаридан «Россиядан музокаралар учун ишончли таклифлар келмаяпти», деб таъкидлади. «Буни (Россиянинг тинчлик музокараларига тайёр эмаслигини) сўнгги кунларда содир бўлган анча шафқатсиз бомбардимон ҳам кўрсатди. Демак, Россиянинг бу ҳаракатлари жуда аниқ позицияни яратади», - деди Вагнер.

Дастлаб DW мухбири ундан Бундестагнинг ҳукмрон Германия социал-демократик партияси (ГСДП) депутати, Берлиннинг собиқ бургомистри Михаэл Мюллернинг ГФР Москва билан алоқани фаолроқ давом эттириши кераклиги ҳақидаги фикрига изоҳ беришни сўради.

«Биз (Россия томонига) вақти-вақти билан суҳбатни бошлашни таклиф қилишимиз керак. "Яшиллар" ва ГСДП буни тушунмаётгани ачинарли», деди Мюллер 2 январь куни эрталаб ARD давлат-ҳуқуқий телеканалининг Morgenmagazin дастурида. «Германия Ташқи ишлар вазирлиги тезда музокарага киришишимиз учун Путиндан бошқа алоқалар ва каналлар кераклигини англаб етса яхши бўларди», — дея қўшимча қилди сиёсатчи.

2022 йил декабрида Украина ташқи ишлар вазири Дмитрий Кулеба Киев февраль ойи охирида БМТ майдонида ва ташкилот бош котиби Антониу Гутерриш воситачилигида «тинчлик саммити» ўтказишни хоҳлашини эълон қилди. Шу билан бирга, Россиянинг унда иштирок этиши уруш жиноятлари учун жавобгарликни ўз зиммасига олиб, халқаро трибунал қаршисига чиқсагина мумкин бўлади, деди Кулеба.

Ўшанда БМТ бу таклифни вазминлик билан қабул қилиб, Антониу Гутерриш «агар иккала томон ҳам бу воситачиликни хоҳласа», Россия ва Украина ўртасидаги тинчлик музокараларида воситачилик қилишга тайёрлигини билдирган.

Шу билан бирга, Кил университети қошидаги Хавфсизлик сиёсати институти раҳбари, профессор Йоахим Краузе Дмитрий Кулебанинг таклифини DW учун изоҳлар экан, бу режага катта умид боғламаслигини очиқ айтди. «Украинанинг тинчлик ташаббусларига келсак, менда ҳозирда жиддий савол белгилари бор. Мен Украина бу билан нимага эришмоқчи эканини билмайман, фақат Россия агрессиясини яна бир қоралашдан ташқари», - деди у.